Categories Navigation

Categories Navigation

El Principáu alcuerda cola Universidá d'Uviéu un plan que garantiza la so estabilidá financiera por un periodu d'hasta diez años

24/01/2022

  • El conseyeru de Ciencia y el rector soscriben un conveniu pal 2022 que sienta les bases del próximu contratu-programa 
  • El Gobiernu d'Asturies va dotar a la institución académica d'un modelu de financiamientu por oxetivos que va dexar planificar al llargu plazu
  • L'alcuerdu d'esti exerciciu incluye 28 indicadores de meyora en docencia, investigación y tresferencia de conocimientu


El Gobiernu d'Asturies va garantizar la estabilidá financiera de la Universidá d'Uviéu con un contratu-programa por un periodu d'hasta diez años. El Principáu y la institución académica llegaron a un alcuerdu doble: per un llau, un conveniu de transición pal 2022 dotáu con 150 millones y, por otru, un modelu de financiamientu que los sos detalles van concretase nos meses próximos y que va tener una vixencia de seis años, prorrogable otros cuatro. 

El conseyeru de Ciencia, Innovación y Universidá, Borja Sánchez, y el rector de la Universidá d'Uviéu, Ignacio Villaverde, firmaron güei’l conveniu pal 2022 y informaron sobre'l futuru alcuerdu que va aprobase a lo llargo del añu. Nel actu participaron tamién la directora xeneral d'Universidá, Cristina González, y el vicerrector de Relaciones Institucionales y Coordinación, Humberto Rodríguez Solla.

L'oxetivu del Principáu ye dotar a la Universidá d'estabilidá presupuestaria al marxe de llexislatures polítiques y mandatos rectorales, con un contratu-programa ente 2023 y 2028, que va poder estendese hasta 2032. “Ye la primer vez que podemos falar d'un compromisu con un horizonte tan llargu, que garantiza una financiación estable mientres una década y facilita a la Universidá programar al llargu plazu”, valoró'l conseyeru.

Sánchez incidió en que parte de la financiación ta vinculada a oxetivos de meyora n'ámbitos de docencia, investigación y tresferencia de conocimientu, que van contribuyir a que la Universidá d'Uviéu meyore puestos nos rankings nacionales y internacionales. 

Pela so parte, el rector, Ignacio Villaverde, valoró de forma bien positiva'l fechu d'algamar un alcuerdu financieru con una vixencia que supera un mandatu, y precisó que los indicadores del financiamientu por oxetivos “tán alliniaos col plan estratéxicu de la institución, que van presentase nos díes próximos, y van contribuyir a señalizar los pasos qu’han dase pa consiguir una meyor Universidá”.

Les cifres coles que va cuntar el futuru contratu-programa van concretase nos meses próximos. Sicasí, el puntu de partida ye'l conveniu soscritu güei, con 150 millones, recoyíos nel presupuestu d'anguaño. Esta partida incluye l'aportación ordinaria, el plan d'inversiones, el financiamientu por oxetivos y la compensación pola conxelación del preciu de la matrícula universitaria.

La mayor novedá céntrase nel financiamientu por resultaos, con una dotación de 2,5 millones. Esti apartáu incluye 28 indicadores en seis ámbitos, ente los que figuren los siguientes: meyora de la tasa de rindimientu del alumnáu, medría d'estudiantes estranxeros, aumentu de publicaciones científiques d'escelencia, númberu de tesis, patentes, más cátedres con empreses, midíes d'igualdá o reducción de gastos enerxéticos son dalgunos de los indicadores recoyíos. 

La tabla completa ye esta: