Categories Navigation

Categories Navigation

El portal de Tresparencia del Principáu, el más valoráu ente les páxines de les alministraciones públiques del país

24/05/2021

  • Una evaluación nacional concede a la web una puntuación de 91,4 sobre 100 puntos

 

El portal de Tresparencia del Principáu encabeza la valoración ente toles páxines de les alministraciones públiques na evaluación realizada pol Conseyu de Tresparencia y Bon Gobiernu d’España. Con una puntuación de 91,4 puntos sobro 100, aventaya en cuasi 7 al segundu, el de Castiella La Mancha (84,5) y en más de 8 al de la Comunidá de Madrid (83,3), que s’asitia nel tercer puestu.

Esta evaluación incluye a seis comunidaes, les ciudaes autónomes de Ceuta y Melilla, y once entidaes locales. L’análisis llevóse a cabu nel 2020 siguiendo la metodoloxía diseñada pol mesmu conseyu en collaboración cola Axencia Estatal d’Evaluación de les Polítiques Públiques y la Calidá de los Servicios.

Según l’informe, l’índiz de cumplimientu de la información obligatoria pol Principáu d’Asturies “pue considerase mui alto”. El documentu destaca tamién la información de relevancia xurídica y la patrimonial, dambes con un 100 %.

Amás, Asturies lidera tamién con 87 puntos la forma y accesibilidá de la información económica, presupuestaria y estadística, anque’l conseyeru considera que nesti apartáu entá queda marxe de meyora.

“Los resultaos d’esta evaluación independiente demuestren que’l Principáu d’Asturies ta a la cabeza de la tresparencia ente les Alministraciones públiques. Sicasí, vamos siguir trabayando, porque esti Gobiernu tien el compromisu firme d’avanzar nesti ámbitu, en participación y en rindición de cuentes, los pegollos sobre los que se sofita l’enfotu públicu nes instituciones democrátiques”, señaló la conseyera de Presidencia, Rita Camblor.

El portal de Tresparencia púnxose en marcha’l  23 de marzu del 2013 y los sos conteníos foron evolucionando y aumentando, en función de les socesives  normes aprobaes a nivel nacional y autonómicu.

La entrada en vigor de la Llei de Tresparencia rexonal n’avientu del 2018 supunxo un saltu escomanáu nel númberu de conteníos publicaos nel portal. Amás, el Principáu trabaya yá nel desenvolvimientu d’una web nueva que facilite l’accesu a la información con más formatos y l’usu de ferramientes interactives como’l visor presupuestariu habilitáu apocayá.

 

Consultar les evaluaciones realizaes pol Conseyu de Tresparencia