Categories Navigation

Categories Navigation

El Principáu empieza les obres de meyora y enanche de la carretera de L’Arena a Ranón, a les que destina 2,6 millones

26/04/2021
  • Los trabayos van obligar a cortar la vía al tráficu, de llunes a vienres de 8 a 20 hores, nos seis meses vinientes.

La Conseyería de Mediu Rural y Cohesión Territorial va empezar el llunes les obres d’enanche y meyora de la carretera AS-318, con un llargor de 5,7 quilómetros que xunta la localidá de L’Arena, en Sotu’l Barcu, cola carretera nacional N-643, na rodiada del aeropuertu d’Anzu, en Castrillón. Los trabayos axudicáronse en cuasi 2,6 millones a la empresa Alvargonzález Contratas S.A., con un plazu máximu de 24 meses.

L’actuación va aumentar de manera bien notable la funcionalidá y seguranza d’esta vía, que val d’accesu a los núcleos de La Cuesta, Ranón, Carbayal y Figueras. Pa eso, van ameyorase’l so anchor y elementos funcionales como’l sistema de drenaxe, la señalización y les barreres de seguranza. En concreto, la plataforma actual va aumentase hasta algamar los 6 metros d’anchu, a los que se van sumar les correspondientes bermes y sobreanchos en curves.

Nesti sentíu, va aprovechase al máximu’l trazáu actual, ampliando’l radiu de les curves más zarraes y enanchando la plataforma. D’esta manera, va ganar en visibilidá y va ser posible l’encruz de dos vehículos con seguranza a lo llargo de tol trazáu.

Les característiques del vial actual, con un anchu inferior a los 4,5 metros en munchos tramos, imposibiliten compatibilizar les escavaciones y movimientos de tierra col caltenimientu del tráficu. Por esti motivu, la vía va tar cortada, de llunes a vienres, ente les 8:00 y les 20:00 hores, a lo llargo d’alredor de seis meses, dexando pasu al tresporte escolar y a vehículos d’emerxencia. N’ochobre, van revisase los horarios del corte.

Nesti periodu, los usuarios de la vía puen usar como rutes alternatives la carretera SB-3 ente L’Arena y Sotu’l Barcu, la N-632 ente Sotu’l Barcu y la intersección cola N-643 y la N-643 hasta l’encruz en Ranón.

P’aforrar mayores problemes, optóse por trabayar con un únicu equipu de movimientu de tierres, que dexe que los vecinos de les poblaciones peles que traviesa la carretera puedan salir o entrar a la so casa pel llau onde nun se tea realizando la escavación.

Amás de la renovación integral del firme, el proyectu rediseña dafechu la rede de drenaxe actual, pa lo que se van habilitar 8.892 metros lliniales de cuneta, 26 caños pa desaguadoriu, 1.554 metros de colector y va actuase sobre dos obres de drenaxe tresversal de 29 metros. La señalización, el balizamientu y los sistemes de contención de vehículos tamién se van anovar totalmente.

Los tramos pequeños que queden abandonaos col trazáu nuevu van integrase ambientalmente na redolada. Amás, les turries van tratase pa menguar l’impactu visual y evitar la erosión superficial.

La obra incluye, amás, l’acondicionamientu de los cruces existentes a lo llargo del trazáu y el rediseñu de la intersección cola N-643, que la so seguranza ameyórase con una cuña de cambéu de velocidá.