Categories Navigation

Categories Navigation

L’avance de la construcción de les viseres na carretera de Sotres obliga a realizar cortes de tráficu temporales a partir del martes

26/04/2021

- El Gobiernu d’Asturies invierte 1,2 millones na obra, que yá ta executada nun 70 %.

- Dos cuadriyes trabayen dende payares pa revistir en piedra, de manera artesanal, les cuatro cubiertes .

La meyora de les obres na carretera AS-264, que xunta Arenas y la llende con Cantabria per Sotres, van obligar a realizar cortes de tráficu a partir del martes, día 27 d’abril, pal montaxe de los elementos prefabricaos que conformen la llosa cimera de les viseres antiargayos. Esta operación esixe l’usu de grúes, plataformes y camiones que van ocupar la calzada. Desque montaos, va procedese al ferralláu y formigonáu.

Los cortes de circulación, que podríen allargase hasta xunu, van producise, de llunes a vienres, de 9:00 a 13:00 y de 14:00 a 20:00 hores. Tanto a primer hora de la mañana (8:30 a 9:00 hores) como n’horariu vespertín (16:30 a 17:00 hores), va dexase pasu a autobuses. Amás, la vía tamién se va abrir al tráficu en casu d’emerxencia.

La Conseyería de Mediu Rural y Cohesión Territorial reinició de manera graduada les obres el 25 de febreru, desque pasaos los temporales y el peligru d’ádenes de nieve y piedres.

Les estructures de protección o viseres que se tán construyendo configúrense a partir de pórticos ríxidos de cubrición de la plataforma que, a manera de túnel falsu, eviten l’amontonamientu de nieve y la cayida de piedres na carretera, dexando qu’estos elementos pasen enriba d’dende la canal de desmonte hasta la turria de lladera.

El Gobiernu d’Asturies invierte 1,2 millones nesta obra, que da serviciu a los vecinos de Tielve, Sotres y Tresviso (Cantabria) y que yá ta executada nun 70 %. Asina, remataron los movimientos de tierra, consistentes sobre manera n’escavaciones en peña sano, amás de les cimentaciones micropilotaes de les cuatro viseres, que los sos alzaos atópense tamién cuasimente remataos.

En xunu, desque acaben los trabayos de formigonáu de les lloses cimeres de toles viseres, va restaurase’l firme y van completase los llabores de revestimientu en piedra, un trabayu artesanal nel que dos cuadriyes trabayen dende payares. L’oxetivu ye que la cara vista de les viseres se remate con aplacáu de piedra pa cumplir colos requisitos estéticu y medioambiental.