Categories Navigation

Categories Navigation

La Conseyería d’Industria anima a les empreses a presentase a les ayudes nueves pa proyectos nes comarques mineres

25/04/2021

- Les llinies de subvenciones Miner y Miniminer, con una dotación de 27 millones hasta’l 2024, empobínense a inversiones xeneradores d’empléu

- Estes convocatories, xestionaes n’Asturies pol Idepa, impulsaron iniciatives por valor de 220 millones y crearon 806 puestos de trabayu nel periodu 2014-2018

 

La Conseyería d’Industria, Empléu y Promoción Económica anima a les empreses asturianes a presentase a les convocatories nueves de les llinies d’ayudes Miner y Miniminer pa proyectos d’inversión xeneradores d’empléu nes comarques mineres, que’l so plazu de solicitú empezó’l vienres.

El Ministeriu pa la Transición Ecolóxica y el Retu Demográficu, al traviés del Institutu pa la Transición Xusta (ITX), llanzó dos convocatories dotaes con 27 millones pal periodu 2021-2024 cola mira de promover el desenvolvimientu alternativu de conceyos mineros. P’anguaño, el presupuestu xube a 2,7 millones.

L’Institutu de Desenvolvimientu Económicu del Principáu (Idepa) ye l’organismu collaborador col ITX pa favorecer que los proyectos asturianos puedan beneficiase de les ayudes. Asina, les empreses puen dir a la sede del organismu en Llanera p’asesorase de forma personalizada sobre les convocatories y, especialmente, sobre la viabilidá y encaxe de los proyectos nes dos llinies de subvenciones.

L’oxetivu d’estes convocatories ye asegurar el desenvolvimientu alternativu sostenible p’árees xeográfiques afectaes pol zarru de les esplotaciones mineres, menguando los efectos desfavorables pal empléu y l’actividá económica, y apurriendo alternatives de futuru.

Tanto les ayudes empobinaes a proyectos d’inversión (Miner) como les destinaes a proyectos d’inversión pequeños (Miniminer) son a fondu perdíu pa la inversión d’iniciatives empresariales xeneradores d’empléu. Puen beneficiase persones físiques o xurídiques privaes con personalidá xurídica, amás d’agrupaciones integraes por elles, les comunidaes de bienes y los trabayadores autónomos con un proyectu d’inversión.

Con una dotación de 20 millones (2 millones nel 2021), la llinia Miner esixe una inversión subvencionable mínima de 100.000 euros y la creación, polo menos, de trés puestos de trabayu. Les Miniminer cunten con una dotación de 7 millones (700.000 euros nel 2021) nos que s’esixe una inversión subvencionable d’ente 30.000 y 500.000 euros cola creación de, polo menos, un puestu de trabayu.

Tocante a les acciones subvencionables, dambes convocatories van financiar inversiones destinaes a terrenos y obra civil, bienes d’equipu, instalaciones, maquinaria, planificación, inxeniería de proyectu, otres inversiones materiales y activos materiales.

Nes últimes convocatories d’ayudes a les comarques mineres, nel periodu 2014-2018, aprobáronse 302 proyectos n’Asturies que xeneraron inversiones por valor de 220 millones y la creación de 806 puestos de trabayu. La subvención concedida a estos proyectos algamó los 26,7 millones.

Pa qu’estes iniciatives puedan beneficiase de les ayudes al desenvolvimientu alternativu de les comarques mineres asturianes, tienen que s’allugar en dalgún de los siguientes conceyos:

  • Conceyos mineros mui afectaos pol procesu de zarru d’empreses de la minería del carbón: Ayer, Bimenes, Cangas del Narcea, Casu, Degaña, Xixón - La Camocha, Ibias, Llangréu, Llaviana, Ḷḷena, Mieres, Morcín, Uviéu - Lluniego, Piloña, Quirós, La Ribera, Riosa, Samartín del Rei Aurelio, Siero, Sobrescobiu, Teberga, Tinéu.
  • Los demás conceyos afectaos pol procesu de zarru d’empreses de la minería del carbón: Ayande, Avilés, Balmonte de Miranda, Cabranes, Caravia, Carreño, Castrillón, Colunga, Corvera, Xixón, Gozón, Grau, Illas, Llanera, Nava, Noreña, Uviéu, Parres, Ponga, Proaza, Les Regueres, Salas, Santu Adrianu, Sariegu, Somiedu, Valdés, Villaviciosa, Villayón y Tameza.