Categories Navigation

Categories Navigation

El Principáu adelántase al cumplimientu de les midíes del Pactu Verde Européu na PAC cola convocatoria d’anguaño

26/04/2021

- L’Executivu consolida’l so apueste medioambiental con xubíes nos contratos d’esplotación ganadera sostenible qu’en dellos casos superen el 100 % al respective del añu anterior.

- El modelu agroganaderu familiar de la cornisa cantábrica ta alliniáu cola estratexa de la UE, que tien como exa principal moderar el consumu d’agua y producir alimentos de calidá.

El cambéu del Programa de Desenvolvimientu Rural (PDR) dexa al Principáu adelantase al cumplimientu de les midíes del Pactu Verde Européu vinculaes a la Política Agraria Común (PAC) 2023-2027. Pal periodu nuevu, el 30 % de los fondos del PDR tienen que se dirixir a midíes alliniaes colos retos comunitarios en materia de clima y mediu ambiente, un porcentaxe que yá algama Asturies.

El Principáu cunta anguaño con cuasi 150 millones (148.282.808 euros) de fondos europeos de la PAC. D’ellos, 64 correspuenden a los pagos del primer pilar, destinaos a les ayudes directes a llabradores y ganaderos, al traviés del Fondu Européu Agrícola de Garantía (Feaga). Lo demás son les subvenciones del segundu pilar, empobinaes al desenvolvimientu rural y los compromisos medioambientales del sector primariu, y financiaos al traviés del Fondu Agrícola de Desenvolvimientu Rural (Feader).

La modificación del PDR y de les posteriores bases de la convocatoria del 2021 dexaron al Gobiernu d’Asturies consolidar el so apueste medioambiental, de manera que la cuantía destinada a los contratos d’esplotación ganadera sostenible (CES) aumenta en 15 millones. Asina, cuasi’l 50 % del total d’ayudes del fondu Feader oriéntase a compromisos medioambientales: unos 42 millones d’un total de 84.

Les medríes más significatives céntrense nes midíes pa zones con llimitaciones naturales, dotaes con 21 millones (106,9 % más que nel 2020), la partida de la Rede Natura 2000, que cuasimente se dobla hasta llegar al millón, y les ayudes d’Agroambiente y Clima, que cunten con daqué más de 7,9 millones (51,4 % más), y de Producción Ecolóxica, que xuben un 91,86 %, hasta los 3,2 millones. Estes dos últimes midíes incluyen delles llinies, con esta distribución:

MididaLliniaCuantíaIncrementu
Agroambiente y climaProducción ganadera sostenible y conservación del paisaxe4.632.00032,8 %
Agroambiente y climaCaltenimientu de races autóctones2.360.000153,76 %
Agroambiente y climaApicultura pa la biodiversidá350.32074,88 %
Agroambiente y climaPlantaciones de mazanal pa fomentar la biodiversidá625.000=
Producción ecolóxicaConservación y caltenimientu ganadería ecolóxica2.750.00091,17 %
Producción ecolóxicaConservación y caltenimientu agricultura ecolóxica335.00069,85 %
Producción ecolóxicaConservación y caltenimientu apicultura ecolóxica118.400249,26 %

Otra de les midíes del PDR ye’l programa Leader, que cunta con 26,4 millones na convocatoria actual, la de más dotación económica de la historia. El Gobiernu d’Asturies prevé, nel periodu de transición, medríes sosteníes de polo menos el 5 % anual pa esta midida de sofitu a l’actividá de los grupos d’acción local.

El conseyeru de Mediu Rural y Cohesión Territorial, Alejandro Calvo, que güei celebró una xunta telemática colos sos homólogos de Galicia, Cantabria y País Vascu, sorrayó que’l modelu agroganaderu familiar y sostenible de la cornisa cantábrica tamién ta alliniáu cola estratexa verde, que tien como exa principal la moderación del consumu d’agua y la producción d’alimentos de calidá.

Los responsables de mediu rural de les cuatro comunidaes alcordaron reforzar la so defensa d’esti modelu, cola definición d’una posición técnica consensuada a la que podríen sumase otros territorios, de cara a la negociación del plan estratéxicu nuevu de la PAC. 

Audio (Mp3: 749 Kb)