Categories Navigation

Categories Navigation

El Gobiernu d'Asturies destina 250.000 euros a ayudes pa proyectos d'acción humanitaria

03/05/2021

- Estes subvenciones contribuyen a protexer y salvar vides de poblaciones en situación de crisis aguda o crónica.

El Gobiernu d'Asturies publicó esta selmana nel Boletín Oficial del Principáu (Bopa) la primer convocatoria singularizada d'ayudes p’apoyar la execución de proyectos d'acción humanitaria, por un importe de 250.000 euros. Estes subvenciones, que nun va poder superar los 50.000 euros el so importe individual, contribúin a protexer y salvar vides de poblaciones en situación de crisis aguda o crónica. El plazu de solicitú remata'l 28 de mayu

Los fondos empobínense a garantizar el suministru de l'asistencia necesaria a persones afectaes por emerxencies complexes o crisis cróniques, sosteníes y recurrentes, especialmente cuando les poblaciones nun puedan llograr respaldu de les sos propies autoridaes.

Tamién dexen prevenir el sufrimientu, por aciu l'anticipación énte eventuales desastres; atender necesidaes básiques inmediates y promover los derechos de les poblaciones damnificaes, dende un enfoque basáu nel amenorgamientu de la vulnerabilidá y el fortalecimientu de les capacidaes y la resiliencia.

Amás d'esti tipu d'acciones pa garantizar la subsistencia inmediata, les subvenciones que convoca'l Principáu tamién financien otru tipu de midíes que contribuyan a frenar la descomposición del texíu económico y social, mesmo qu’a sentar les bases pa la rehabilitación y el desenvolvimientu, por aciu acciones empobinaes a la rehabilitación posterior a les crisis.

Les intervenciones d'acción humanitaria han rexise polos principios d’humanidá, neutralidá, imparcialidá ya independencia. Nesti contestu, considérense elementos esenciales d'estes polítiques la participación de les poblaciones afectaes, la calidá de l'ayuda, la eficiencia, la tresparencia, la rindición de cuentes y l'enfoque de xéneru.

 

 

Convocatoria (Pdf: 186 Kb)