Categories Navigation

Categories Navigation

El Gobiernu d'Asturies empecipia la construcción de la depuradora de Vega, en Ribeseya, que supón una inversión de 500.000 euros

03/05/2021

- Mediu Ambiente prevé empezar en payares el saneamientu de la cuenca del ríu Samiguel, al que va destinar casi un millón

 - El vicepresidente Juan Cofiño visita'l conceyu y presenta delles actuaciones de la conseyería a la corporación municipal
 
La Conseyería d'Alministración Autonómica, Mediu Ambiente y Cambéu Climáticu empecipió esta selmana les obres de construcción de la estación depuradora d'agües residuales (EDAR) de Vega, en Ribeseya, que van tener un costu de 500.000 euros y un plazu d'execución de siete meses.
 
El vicepresidente del Gobiernu y titular d'esta conseyería, Juan Cofiño, visitó güei el conceyu, onde s'axuntó col alcalde, Ramón Canal, y los voceros de los grupos municipales pa esplica-yos esti proyectu y otres actuaciones previstes pola conseyería.
 
Cofiño señaló qu'esta nueva infraestructura, cofinanciada pol Fondu Européu de Desenvolvimientu Rexonal (Feder), “va repercutir bien favorablemente na calidá de les agües del monumentu natural de la playa de Vega, yá que va evitar el deterioru ambiental que causen los arramaos al regueru que desagua nel arenal”.
 
La EDAR va constar d'un alliviaderu-bombéu d'agües brutes y la llinia de tratamientu va tar formada por dos unidaes compactes nes que se van integrar elementos como un tanque primariu, un reactor biolóxicu y un decantador secundariu, amás d'un tanque de sedimentación primariu.
Nel futuru, ta prevista la incorporación a esta nueva depuradora de los arramaos de les localidaes de Torre y Barredo, mesmo que los del camping de Vega.
 
El proyectu inclúi, ente otres actuaciones, la execución d'un colector a la entrada de la estación de tratamientu, conectáu cola rede de saneamientu existente nesos trés puntos. Pa recoyer los arramaos que se realicen na zona de la playa, proxéctase un bombéu que va enllazar col colector d'entrada.
 
Saneamientu de la cuenca del ríu San Miguel
 
Per otra parte, el vicepresidente anunció tamién qu'el so departamentu va invertir 940.000 euros nes obres de saneamientu de la cuenca del ríu Samiguel, que'l so entamu ta previstu pa payares. El proyectu va tener un plazu d'execución de 18 meses y la previsión tresañal de la inversión ye de 70.000 euros en 2021, 600.000 en 2022 y 270.000 en 2023.
 
Cofiño señaló que la finalidá d'esta intervención, que va salir a llicitación en xunu, ye la recoyida d'agües residuales de les poblaciones rioseyanes d'El Carmen, Samiguel, Sotu y Pandu, pa conduciles hasta Sebreñu, que dispón d'una rede de saneamientu, que llega hasta la EDAR de Ribeseya. Les localidaes que se van conectar a esta infraestructura sumen 420 habitantes.
 
“El diseñu hidráulicu va tener en cuenta, amás, les necesidaes de saneamientu del camping, mesmo que l'aumentu d'ocupación que se produz de forma estacional nes viviendes de la zona, qu'obliga a atender a una población que supera les 1.500 persones”, esplicó.
 
Esta obra completa otres apocayá executaes pol Principáu nel conceyu, como la reforma de la estación de bombéu de Sebreñu, que supunxo una inversión de 295.800 euros.
 
Infiltraciones d'agua marino
 
Cofiño anunció que Medio Ambiente podría abordar anguaño delles meyores pa solucionar los problemes que se producen poles infiltraciones d'agües marines nes redes de saneamientu de Ribeseya.
 
Pa ello, el presupuestu de la conseyería incorpora 500.000 euros pa realizar un estudiu sobre estes infiltraciones nos conceyos costeros y otros 750.000 destinaos a iguales, de los que 400.000 prevense invertir esti añu y el restu en 2022.
 
L'estudiu, que ta en fase de llicitación, va analizar les redes de saneamientu en diez cais de Ribeseya pa determinar esti tipu de problemes que sufre la rede d'alcantarelláu y definir el so arreglu.

Audio (Mp3: 455 Kb)