Categories Navigation

Categories Navigation

El Principáu invierte unos 220.000 euros na meyora de la carretera de Caldevilla, en Piloña

04/05/2021
  • Mediu Rural actuó apocayá na PI-2, que xune Ponte Ferreros y Les Cuerries, y na PI-11, que comunica Carbayeda con Cerecea
  • Infraestructures va empecipiar nel tercer trimestre les obres nes víes de Torazu y Priede

La Conseyería de Mediu Rural y Cohesión Territorial empecipió güei l'arreglu de la carretera de Caldevilla, en Piloña, axudicada a la empresa Tratamientos Asfálticos (Trasfalt) por 218.773 euros y con un plazu d'execución de cuatro meses. La directora xeneral d'Infraestructures Viaries y Portuaries, Esther Díaz, visitó esta mañana les obres d'esta vía, a la que se llega dende l'AS-339 (Tendi- Sellañu), nes proximidaes de la población de Sebares.

El pavimentu presentaba defectos qu'afectaben tanto a la seguridá como a la durabilidá de la infraestructura, y menguaben la comodidá de los usuarios. Pa revertir esta situación, va rehabilitase'l firme y va fresase’l pavimentu nos tramos nos que resulte necesario. El contratu incluye tamién la meyora del sistema de drenaxe, el pintáu de marques viales y la instalación de la señalización vertical, lo mesmo que de dellos tramos de barrera de seguridá.

Estes obres súmense a otres inversiones realizaes apocayá en Piloña por un importe próximo a los 100.000 euros, como l'arreglu de dellos fundimientos na PI-2, que xune Ponte Ferreros y Les Cuerries, y d'otru na carretera de Carbayeda y Cerecea (PI-11), na que tamién s'ameyoró'l drenaxe.

Esther Díaz, que tuvo acompañada na visita pol alcalde de Piloña, Iván Allende, esplicó que’l so departamentu tien previstes actuaciones importantes na zona, concretamente na carretera de Torazu (AS-334) y la PI-12 (Priede), con un presupuestu superior al millón d'euros. En dambos casos, les obres podríen empezar nel tercer trimestre del añu.

- Audio