Categories Navigation

Categories Navigation

El Consorciu d'Agües concede 208.000 euros a Siero pa la meyora de la rede de suministru de la zona industrial de Granda y Meres

04/05/2021
  • El vicepresidente Juan Cofiño y l'alcalde del conceyu, Ángel García, firmen un conveniu de collaboración que va dexar incrementar la garantía de suministru

El vicepresidente y conseyeru d'Alministración Autonómica, Mediu Ambiente y Cambéu Climáticu, Juan Cofiño, y l'alcalde de Siero, Ángel García, soscribieron güei un conveniu de collaboración que va dexar acometer la primer fase de les obres de renovación y refuerciu de la rede de suministru d'agua municipal na zona industrial de Granda y Meres.

Mediante esti alcuerdu, el Consorciu d'Agües d'Asturies (Cadasa), que preside'l vicepresidente, va conceder al conceyu una subvención de 208.853 euros pa financiar el proyectu. Esta cantidá va distribuyise ente 2021 y 2024, con una dotación anual de 52.213 euros.

L'actuación va dexar incrementar de manera bien notable, con recursos hídricos del consorciu, la garantía de serviciu tanto a les árees urbanes y industriales abastecíes pol Conceyu de Siero como a la factoría de la Central Llechera Asturiana, usuariu directu de Cadasa.

Les obres incluyen la execución de la interconexón de los depósitos de Granda y Cotorbán pa reforciar el suministru a la parte de Granda, Llugones y a les instalaciones de la Central Llechera Asturiana. De la mesma, van dexar incrementar los tiempos disponibles pa que'l consorciu pueda llevar a cabu trabayos de caltenimientu na so rede de suministru.