Categories Navigation

Categories Navigation

El Principáu invierte más de 254.000 euros na meyora de la carretera AS-340, que xunta Corao y Cuevas

04/05/2021

La Conseyería de Mediu Rural y Cohesión Territorial va empezar mañana les obres d’arreglu de seis fundimientos alcontraos ente los puntos quilométricos 1 y 9.6 de la carretera AS-340, que xunta Corao, en Cangues d’Onís, con Cuevas, en Llanes.

La obra, axudicada en 254.100 euros a la empresa Ingeniería de Construcción y Obra Civil de Asturias (CGS), tien un plazu d’execución de cuatro meses y céntrase nel conceyu de Cangues d’Onís.

La vía tien un llargor d’alredor de 25 quilómetros y a ella llégase sobre manera al traviés de la carretera AS-114 (Cangues d’Onís-Panes), nel llugar de Corao.

Les obres pa restituyir la estabilidá de la plataforma consisten na construcción de dos murios d’escollera y otros trés de carriles. Amás, va actuar sobre los márxenes pa quitar delles irregularidaes, van ameyorase los drenaxes, va llimpiase’l tramu y va reponese’l firme. El contratu incluye la reposición y instalación de barreres de seguranza, amás del pintáu de marques viales nos tramos pavimentaos.

Nel so apueste pol caltenimientu de los más de 4.200 quilómetros de carreteres autonómiques, Mediu Rural reparó apocayá otru fundimientu nel quilómetru 9.2 de la mesma vía y tamién ameyoró l’allumáu de l’AS-114. Dambes actuaciones supunxeron un desembolsu de 63.400 euros.