Categories Navigation

Categories Navigation

Salud aprueba 180.000 euros n’ayudes pa les asociaciones de pacientes con enfermedaes cróniques

05/05/2021

  • Les subvenciones van financiar acciones d’información, orientación, sofitu y rehabilitación

La Conseyería de Salú aprobó la convocatoria d'ayudes de 2021 pa les asociaciones de pacientes con enfermedaes cróniques n'Asturies. La cuantía de les subvenciones xube a 180.000 euros, tal que publica güei el Boletín Oficial del Principáu d'Asturies (Bopa).

Esta ayuda va dirixida a los colectivos y fundaciones ensin ánimu d'arriquecimientu que tengan nos sos oxetivos l'atención a pacientes con enfermedaes cróniques y los sos familiares. En concreto, ta destinada a aquellos colectivos  que desenvuelven acciones d'información, orientación, sofitu y rehabilitación de persones con una patoloxía permanente.

Les subvenciones van cofinanciar aquellos gastos derivaos del desenvolvimientu de los programes que cumplan coles bases de la convocatoria. Los criterios de selección van tener en cuenta'l númberu de persones beneficiares directamente y van primar les actividaes destinaes a la rehabilitación física y psicolóxica de los pacientes sobre les de sofitu, información o divulgación pública de les característiques de la enfermedá.

De la mesma manera, tamién se van analizar les actividaes dedicaes a la prevención de complicaciones, les acciones que fomenten la reincorporación social o llaboral, mesmo que les actividaes que promuevan  el voluntariáu (pa ello va ser necesario dexar constancia del númberu de voluntarios, el tiempu d'actividá que desenvuelven y la so dedicación horaria).

Nestes ayudes tamién se van valorar les actuaciones a desenvolver en zones d'Asturies con menos dotación de servicios sanitarios.

El plazu de presentación de les solicitúes va ser de quince díes hábiles a cuntar a partir de mañana na see electrónica del Principáu d'Asturies (https://sede.asturias.es ). La convocatoria pue atopase col códigu AYUD0216T01.