Categories Navigation

Categories Navigation

El Gobiernu d’Asturies va invertir esti añu 1.557.000 euros n’equipos y soportes informáticos pa modernizar la xusticia

11/05/2021

- El presupuestu inclúi l’adquisición de portátiles, impresores, pantalles, medios pa la grabación de vistes y otros servicios.

- El Principáu tamién ta renovando los ordenadores de mesa de xueces, maxistraos y fiscales, un procesu que va acabar nun par de meses.

El Gobiernu d'Asturies va invertir hasta finales d'añu 1.557.000 euros na alquisición d'equipos, soportes y servicios informáticos para reforzar el proyectu de modernización de la xusticia.

La conseyera de Presidencia, Rita Camblor, esplicó na Xunta Xeneral que la xusticia va atropar 1,5 de los 4,5 millones que'l Principáu va destinar anguaño a nueves tecnoloxíes de la información y la comunicación. La distribución d'esi millón y mediu va facese de la siguiente manera: 182.000 euros pa equipos d'impresión, 150.000 pa impresores venceyaes a un puestu de trabayu, 65.000 pa instalar pantalles nes sales de vistes, 200.000 pa portátiles, 160.000 pa servicios de soporte informáticu y formación y otros 800.000 pa sistemes de grabación de vistes. Estos postreros van adquirise con cargu a los fondos europeos que se van recibir anguaño.

La inversión forma parte d'un ampliu proyectu de modernización qu'empezó cola sustitución de los ordenadores de mesa de xueces, maxistraos y fiscales por equipos portátiles, un procesu que va rematar nun par de meses. Darréu, va dotase de portátiles más modernos y con facilidaes pal teletrabayu a los lletraos y a la mayor parte del personal funcionario de les oficines xudiciales.

Amás, empecipiáronse les xeres d'acompañamientu en determinaos xulgaos pa facilitar l'usu de les aplicaciones específiques de xusticia. Nesti sentíu, tamién da serviciu presencial, un día a la selmana, nes sedes xudiciales d'Uviéu y Xixón. Los usuarios de tolos órganos van cuntar con esti acompañamientu, empobináu a arreglar duldes y detectar necesidaes concretes de formación.

Nesti contestu, antes del branu van anovase tolos equipos d'impresión, tanto los de multifunción como impresores individuales.

Estes midíes van sirvir pa desaniciar dellos problemes informáticos detectaos dende xineru, fundamentalmente, pola obsolescencia de los equipos y porque cada vez hai más usuarios tramitando espedientes electrónicos, al completase l'alministración electrónica de xusticia y la fiscalía dixital.

 

Infraestructures xudiciales

Na so comparecencia, la conseyera tamién esplicó que'l Colexu d'Arquiteutos d'Asturies ta ellaborando un estudiu integral de les sedes xudiciales con oxetu de determinar les actuaciones necesaries en caúna d'elles.

Nes próximes selmanes, van empecipiase visites a toles sedes pa percanciar datos básicos y afitar prioridaes. Darréu, va redactase un informe de los edificios y les sos necesidaes que se va apurrir n'ochobre, igual qu’otru particularizáu pal partíu xudicial d'Uviéu, que va tar llistu n'avientu, de cara a plantegar una solución definitiva a les sos faltes específiques.

Esti trabayu inclúi la evaluación del estáu de caltenimientu de los edificios y l'analís de l'accesibilidá, les condiciones funcionales, la seguridá énte quemes, la calidá del ambiente interior, l'allugamientu y el tresporte disponible.

Camblor recordó que va unos meses entró en serviciu'l nuevu xulgáu de L.luarca y qu'este mesmu añu empecipiarán les obres en Llangréu. Pela so parte, Pravia va cuntar llueu con una nueva sede nel antiguu edificiu de l'Azucrera, y van realizase obres pa reasitiar el Xulgáu de Violencia pa cola Muyer de Xixón, onde yá s'inauguró la primer Sala Gesell d'Asturies.

 

 Anexo inversiones (PDF: 76 Kb)