Categories Navigation

Categories Navigation

El plan director d’abastecimientu d’agua prevé una inversión de 9,2 millones hasta’l 2030 n’ocho conceyos del occidente

11/05/2021

- La viceconseyera Nieves Roqueñí presentó güei’l documentu a los alcaldes de Taramundi, Grandas de Salime, Pezós, Eilao, Bual, Santalla d’Ozcos, Samartín d’Ozcos y Vilanova d’Ozcos.

- Mediu Ambiente va reforzar el suministru de los conceyos que nun puen conectase a los sistemes supramunicipales.

El Plan Director de Suministru d’Agua del Principáu 2020-2030 prevé una inversión de 9,2 millones pa los conceyos de Taramundi, Grandas de Salime, Pezós, Eilao, Bual, Santalla d’Ozcos, Samartín d’Ozcos y Vilanova d’Ozcos, según avanzó güei la viceconseyera de Mediu Ambiente y Cambéu Climáticu, Nieves Roqueñí, na reunión que tuvo colos alcaldes d’estos ocho conceyos del occidente.

La viceconseyera esplicó a los rexidores la distribución de los fondos. Asina, 1,1 millones van destinase a l’adecuación de les captaciones, 2,4 a la construcción de depósitos d’almacenamientu de recursos y 3,8 a instalaciones de potabilización. Amás, otra partida de 1,1 millones va dedicase a depósitos d’almacenamientu d’agua potabilizao y 800.000 euros a la dixitalización de la xestión, amás d’al inventariáu y estudiu de los sistemes de suministru.

Nel alcuentru, celebráu en Taramundi, tratáronse los oxetivos y midíes previstes nel plan mentáu, anguaño en periodu d’información pública, rellacionaes con estos conceyos del occidente. Toos ellos comparten característiques comunes en xestión del agua, porque obtienen los sos recursos de captaciones superficiales y nun resulta viable la so conexón a nengún sistema supramunicipal.

Roqueñí treslladó a los responsables municipales la necesidá de trabayar a comuña “pa identificar soluciones más sostenibles, cola mira de garantizar el suministru y la calidá del recursu d’una manera conxunta pa tol territoriu, anque afechu a les peculiaridaes de cada zona”.

El plan propón el refuerzu de los principales sistemes de suministru municipales de los ocho conceyos cola construcción de depósitos d’almacenamientu capaces a guardar el volume necesario pa satisfacer les demandes d’agua n’alta más de 15 díes. Tamién incorpora la execución d’instalaciones de potabilización afeches a les demandes, aparte de la construcción de depósitos d’almacenamientu d’agua potabilizao que, colos yá existentes, garanticen una capacidá de regulación superior a les 48 hores.

Igualmente, quier encarase la dixitalización de la rede de suministru n’alta y captación, cola instalación d’equipos de midida y adquisición remota de datos de los caudales captaos, los volúmenes suministraos y los parámetros d’operación, pa menguar les perdes de la rede y aumentar la so eficiencia.

Roqueñí sorrayó la necesidá d’anovar les infraestructures hídriques y garantizar el so caltenimientu afayadizu, cola mira de rebaxar les fugues y perdes y cumplir colos parámetros tan esixentes de calidá pal agua de consumu humanu “nun escenariu futuru d’escasez de recursos de resultes del cambéu climáticu”.

La finalidá principal del plan de suministru consiste en garantizar el suministru sostenible a tola población asturiano y a los sectores económicos. Tamién propón la meyora de la calidá, tanto del agua abastecío como de les mases naturales; el fomentu del usu sostenible de los recursos hídricos y la recuperación de los costos de los servicios. El documentu, que cunta facer una inversión de 423 millones n’Asturies a lo llargo de la so década de vixencia, estructúrase en cuatro programes: infraestructures, xestión y gobernanza, calidá del agua y sostenibilidá. Estos programes desenvuélvense, amás, al traviés de 16 llinies d’actuación.

Audio