Categories Navigation

Categories Navigation

El Principáu aprueba la clasificación d’un monte vecinal nuevu en Somiedu y empieza la tramitación d’otres dos solicitúes

12/05/2021

- El conseyeru de Mediu Rural y Cohesión Territorial presidió güei la reunión del xuráu, que tien 33 espedientes principiaos y que’l so trabayu ye esencial pa clarificar la propiedá
 
El Xuráu de Clasificación de Montes en Mano Común aprobó güei la declaración d’un monte vecinal nuevu, el de Corés, en Somiedu, y empezó la tramitación d’otres dos solicitúes.  
 
El monte de Corés súmase asina a los otros 74 d’estes característiques que yá existen n’Asturies. La midida supón que los habitantes d’estos pueblos van poder disponer llegalmente de los terrenos y siguir remanándolos, como vinieron faciendo hasta esti momentu, pero con garantíes xurídiques. D’equí p’arriba, queden pendientes d’ellaboración los planes correspondientes pa optimizar la xestión comunitaria de los recursos forestales.
 
El Xuráu de Clasificación de Montes en Mano Común alcordó, amás, empezar la tramitación d’otres dos solicitúes. Trátase de los espedientes pa la declaración como montes vecinales en mano común d’El Ganzu, en Tinéu, y Parroquia de Quintana, en Balmonte. Tamién analizó otros dos pidimientos de los conceyos de Llanes y Ibias.
 
El Xuráu de Clasificación tien anguaño 33 espedientes en distintes fases de tramitación. El so llabor enmárcase nel plan de choque de los recursos forestales y resulta fundamental pa identificar la propiedá de los terrenos, dar seguranza xurídica y impulsar una organización productiva afayadiza del territoriu. Con estos oxetivos va ayudar a xenerar riqueza y empléu, amás de favorecer la prevención de quemes.
 
Nos últimos meses, esti organismu clasificó trés montes como vecinales en mano común, los primeros en 20 años. Tamién se dotó a los órganos instructores de técnicos esternos de sofitu, un xurídicu y un inxenieru, y sistematizóse’l procedimientu pa dar axilidá y seguranza xurídica. La previsión ye que’l xuráu se reúna con periodicidá bimestral pa dar trámite a los espedientes en cursu.

Audio (Mp3: 512 Kb)