Categories Navigation

Categories Navigation

La empresa Sea Eight va invertir 73 millones na instalación d’un complexu d’acuicultura nel puertu d’El Musel

12/05/2021

- Esti proyectu, enmarcáu na Estratexa d’Atracción d’Inversiones del Principáu, prevé la creación de 145 empleos en seis años.

- Nuna primer fase, la compañía va invertir 12,3 millones na puesta en marcha d’un primer módulu d’engorde de llinguáu con 24 puestos de trabayu .

La empresa Sea Porto S.L. va invertir 73 millones na puesta en marcha d'un complexu industrial de acuicultura nuna parcela del puertu d'El Musel que va dexar crear 145 empleos en seis años. Asina lo anunciaron güei los conseyeros d'Industria, Empléu y Promoción Económica, Enrique Fernández, y de Mediu Rural y Cohesión Territorial, Alejandro Calvo, amás de dellos responsables de la compañía promotora.

Dambos aconceyaron col presidente de Atitlan, Roberto Centenu, grupu empresarial nel que s'integra Sea Porto S.L., y col director xeneral de la sociedá, Jaime León, pa tratar los detalles de la iniciativa, que s'enmarca na Estratexa d'Atracción d'Inversiones y el Programa d'Aceleración de Proyectos Estratéxicos, impulsaos pola Conseyería d'Industria al traviés del Institutu de Desenvolvimientu Económicu del Principáu (Idepa).

Acordies col cronograma del proyectu, nuna primer fase Sea Porto va poner en marcha un primer módulu d'engorde de llinguaos con capacidá pa producir 440 tonelaes al añu. La inversión prevista va ser de 12,3 millones y va implicar la creación de 24 puestos de trabayu.

En fases socesives, plantégase'l desenvolvimientu de cinco módulos adicionales d'engorde y una unidá de reproducción, lo que va suponer una capacidá total de producción de 2.600 tonelaes de quilos de llinguáu añales. El complexu va ponese en réxime de concesión alministrativa nos terrenos del puertu d'El Musel, na zona conocida como La Figal, nuna superficie de 10.000 metros cuadraos.

Col anunciu d'esti proyectu, yá son cuatro les iniciatives empresariales confirmaes nos últimos meses nel marcu de la Estratexa d'Atracción d'Inversiones que, en xunto, van xenerar alredor de 150 millones d'inversión y cerca de 240 puestos de trabayu.

El proyectu Sea Eight presentóse esta mañana a los socios y collaboradores que formen parte del comité de promoción de la Estratexa d'Atracción d'Inversiones. El conseyeru d'Industria amosóse satisfechu colos resultaos algamaos al traviés de la collaboración público-privada y destacó la importancia del proyectu presentáu “non yá pola inversión y l'empléu que va xenerar, sinón pola sostenibilidá, la protección del ecosistema y del mediu ambiente y la tecnoloxía de vanguardia utilizada pola compañía”.

“Esti proyectu supon el refuerzu d'Asturies nun sector nel que, de xuru, tenemos gran potencial por ser una autonomía costera. Esta inversión podría ser la llave d'otres futures nel ámbitu de la economía azul”, sorrayó Enrique Fernández.

Pela so parte, Alejandro Calvo señaló que se trata d'un proyectu alliniáu cola estratexa del Fondu Européu Marítimu y de Pesca (FEMP), qu'ufierta ayudes al sector acuícola y del tresformamientu de los productos de la pesca. Estes subvenciones fueron algamando cifres cada vez más importantes n'Asturies, coles mires de fomentar una acuicultura sostenible, eficiente, innovadora, competitiva y basada na investigación y el conocimientu. Asina, nel periodu 2017-2020 destináronse 2.568.375 euros a sofitar 41 proyectos de promotores asturianos, que supunxeron una inversión global de 5.136.750 euros.

SEA Eight ye una empresa de capital español fundada en 2012, con un accionariáu compuestu por Atitlan Grupu Empresarial, que tien por socios fundadores a Roberto Centenu y Aritza Rodero, y pol empresariu asturianu Jaime León. Ye líder mundial de producción en tierra firme de la variedá de llinguáu solea senegalensis, con dos plantes de producción en Portugal y otra en Galicia, y una capacidá instalada de 1.000 tonelaes añales.

La compañía domina'l ciclu completu, dende la producción de güevos hasta'l productu final de vienta pa consumu y aprove a los líderes de la distribución comercial n'España y Portugal. Ente la so cartera de veceros figuren Mercadona, Marko y la cadena portuguesa Pingo Dolce y cuenta con presencia consolidada na distribución tradicional al traviés de mayoristes en MercaMadrid, MercaBarna y MARL (Lisboa).

 

Declaraciones Consejero de Industria (Mp3: 843 Kb)

Declaraciones Consejero Medio Rural (Mp3: 1246 Kb)