Categories Navigation

Categories Navigation

El Principáu va recibir 14,5 millones pa programes de promoción d’eficiencia enerxética y fomentu d’enerxía renovable

13/05/2021

- El conseyeru d’Industria participó esta tarde na reunión de la conferencia sectorial que decidió’l repartu de fondos.

El Principáu va recibir 14.536.459 euros del Ministeriu pa la Transición Ecolóxica y el Retu Demográficu pal desenvolvimientu de dellos programes empobinaos a la promoción de la eficiencia enerxética y el fomentu de la enerxía renovable. Los fondos tán incluyíos nes partíes vinculaes al Plan de Recuperación, Tresformación y Resiliencia.

L’alcuerdu adoptóse esta tarde na Conferencia Sectorial d’Enerxía, presidida pola ministra Teresa Ribera, y onde participaron el conseyeru d’Industria, Empléu y Promoción Económica, Enrique Fernández, y la directora xeneral d’Enerxía, Minería y Reactivación, Belarmina Díaz Aguado.

La partida enmárcase nel Programa d’autoconsumu y almacenamientu detrás del contador y de promoción de lo renovable térmico que, al empar, estrémase en seis subprogrames. Esta iniciativa va movilizar a nivel nacional 1.100 millones p’autoconsumu y almacenamientu -de los que 660 yá s’asignaron a les comunidaes- y otros 200 pa climatización y agua caliente sanitario renovable en cases.

L’asignación p’Asturies por programes ye ésta:

-Programa 1. Autoconsumu renovable eléctricu en sector servicios, incluyendo almacenamientu enerxéticu: 1.833.056 euros p’autoconsumu y 366.611 p’almacenamientu.

-Programa 2. Autoconsumu renovable eléctricu n’otros sectores (industria y agropecuariu), incluyendo almacenamientu enerxéticu: 2.327.744 euros p’autoconsumu y 465.549 p’almacenamientu, n’industria, y pal sector agropecuariu, 467.421 euros p’autoconsumu y 46.742 p’almacenamientu enerxéticu.

-Programa 3. Incorporación d’almacenamientu enerxéticu n’instalaciones d’autoconsumu renovable yá existentes: pa la industria 698.323, pal sector servicios 183.306 y 46.742 pa l’agricultura.

-Programa 4. Autoconsumu renovable eléctricu pa beneficiarios finales del sector residencial, alministraciones públiques y tercer sector: 5.063.103 euros p’autoconsumu y 379.733 p’almacenamientu.

-Programa 5. Incorporación d’almacenamientu n’instalaciones d’autoconsumu renovable yá existente en sector residencial, alministraciones públiques y tercer sector: 126.578 euros.

-Programa 6. Enerxía renovable térmico nel sector residencial: 2.531.551 euros.

 

Actuaciones en conceyos de menos de 5.000 habitantes

Na conferencia sectorial tamién s’aprobó’l repartu de fondos p’actuaciones en conceyos de menos de 5.000 habitantes. Nel casu d’Asturies, pal programa PREE 5.000, de rehabilitación enerxética d’edificios, correspuénden-y 840.000 euros que va xestionar la Dirección Xeneral de Vivienda. Amás, pal Programa de Desenvolvimientu Urbanu Sostenible (DUS 5.000), d’iniciatives públiques de desenvolvimientu local sostenible, asígnense al Principáu 1.260.000 euros. Tamién s’anunció una convocatoria nacional de 100 millones d’euros empobinada a proyectos singulares en conceyos de menos de 5.000 habitantes.

Finalmente, prorrogóse una modificación del Real Decretu 263/2019, de 12 d’abril, pol que se regula’l programa d’ayudes p’actuaciones d’eficiencia enerxética en pymes y grandes empreses del sector industrial, que va prorrogar la convocatoria d’ayudes, a partir del 30 de xunu, hasta’l 2023.

Esta ye una convocatoria que xestiona con éxitu la Dirección Xeneral d’Enerxía, Minería y Reactivación, porque escosó en dos ocasiones el presupuestu disponible. La primer asignación, de 4.688.692, acabóse nun mes y la posterior ampliación, con 7,3 millones adicionales, yá ta solicitada dafechu. Nesti sentíu, la ministra Teresa Ribera destacó la xestión d’esti programa y del PREE pol Gobiernu d’Asturies polos sos niveles d’execución tan altos.