Categories Navigation

Categories Navigation

El Gobiernu d’Asturies llega a un alcuerdu colos sindicatos pa implantar el teletrabayu na Alministración autonómica

17/05/2021

- La ocupación a distancia de los empleaos públicos va ser voluntaria y reversible.

- L’Executivu va aprobar d’equí a poco’l decretu que va regular la modalidá non presencial.

El Gobiernu del Principáu llegó güei a un alcuerdu colos sindicatos principales –CC. OO., CSIF, SAIF y UXT- pa desenvolver el trabayu a distancia ente’l personal de l’Alministración autonómica, que va dexar a la plantiya teletrabayar de manera voluntaria dos díes a la selmana y otros trés facelo de manera presencial.

Tres d’esti entendimientu, zarráu na mesa xeneral de negociación, presidida pol director xeneral de Función Pública, Miguel Ángel Rodríguez, el Conseyu de Gobiernu va aprobar llueu un decretu que va regular la prestación del serviciu nesta modalidá.

El teletrabajo va tener calter voluntariu y reversible y el modelu va ser rotatoriu, con cuenta de que los empleaos puedan acoyese socesivamente al mesmu y, al tiempu, se garantice la presencia física nes dependencies alministratives a tenor de les necesidaes del serviciu.

Tamién se va tener en cuenta la conciliación, polo que se va realizar un baremu que valore diverses circunstancies de la vida familiar, como la salú y edá del empleáu, según criterios ecolóxicos y de protección del mediu ambiente, al aforrar desplazamientos.

El trabayu a distancia va aplicase al personal funcionario de l’Alministración de Principáu, incluyíu’l docente que nun empreste servicios en centros educativos vinculaos al calendariu escolar. Tamién va poder incorporase al mesmu’l personal llaboral d’organismos públicos, como’l Serviciu d’Emerxencies (Sepa) y la Orquesta Sinfónica (OSPA), ente otros, que realice determinaes funciones. Igualmente, van poder teletrabayar los empleaos de los servicios centrales del Serviciu de Salú del Principáu (Sespa).