Categories Navigation

Categories Navigation

Les obres p’ameyorar la seguridá del túnel de Sotrondio obliguen a cortar hasta’l 2 d’agostu el corredor del Nalón

17/05/2021

- Tol tráficu en dambos sentíos, incluyíu'l tresporte públicu, va esviar a partir de la medianueche del llunes pola carretera AS-387, que xune L'Entregu con El Condáu.

Les obres que la Conseyería de Mediu Rural y Cohesión Territorial executa p'ameyorar la seguridá del túnel de Sotrondio, na redolada del kilómetru 12.5 de la carretera AS-117, que xune Riañu col puertu de Tarna, al so pasu per Samartín del Rei Aurelio, van obligar a cortar por completu'l tráficu de la vía dende la medianueche del llunes hasta'l próximu 2 d'agostu.

Tol tráficu en dambos sentíos va esviase pela carretera AS-387 (L'Entregu-El Condáu), na que'l Principáu invirtió apocayá 190.744 euros pa llimpiar y asegurar una turria asitiada al altor del kilómetru 7.5. Mediu Rural llamenta les incomodidades que pueda causar esti corte temporal. Tantu los conceyos afectaos (Llangréu, Samartín del Rei Aurelio, Llaviana, Sobrescobiu y Casu) como les empreses de tresporte públicu yá fueron informaos.

L'actuación, que va rematar na seronda, supón una inversión superior al millón d'euros, pola necesidá d'adoptar midíes pa combatir la inestabilidá de la fastera nesti puntu.

El proyectu empecipióse en xineru, cuando les agües intenses obligaron a actuar d'emerxencia pa saniar y estabilizar provisionalmente la bóveda del túnel, lo que motivó la esviadura temporal de la circulación. Paralelamente, técnicos especializaos llevaron a cabu llabores d'analís y toma de datos pa los cálculos estructurales de la intervención definitiva. De magar, amás d'avanzar na ellaboración del proyectu constructivu, una empresa especializada actuó nes márxenes derecha ya esquierda del túnel y reforzó les cimentaciones por aciu micropilotes.

Una vegada rematáu esti refuerzu, y cuidao que’l revestimientu na zona de los hastiales ta prácticamente rematáu, el siguiente pasu consiste n'acometer el refuerzu de la bóveda, pa lo que resulta imprescindible cortar el tráficu nel túnel dos meses y mediu.

Nesi períodu, van llevase a cabu otres xeres compatibles coles del revestimientu, como delles asociaes a la llosa d'unión entre encepaos, mesmo que l’ameyora de drenaxes, restitución d'otros servicios afectaos, reconstrucción de les ceres, y otros llabores adicionales.