Categories Navigation

Categories Navigation

Industria publica la Estratexa de Transición Enerxética Xusta pa planificar un modelu nuevu basáu na sostenibilidá y la enerxía renovable

17/05/2021

- Trátase de la primer fueya de ruta autonómica y la única que cuntó col asesoramientu de la Comisión Europea y de la Plataforma de Rexones de Carbón en Transición.

- El testu propón como oxetivos estratéxicos la descarbonización y l’impulsu de les capacidaes d’Asturies al traviés de 16 llinies d’acción y 63 midíes .

  • La Conseyería d’Industria, Empléu y Promoción Económica concluyó la Estratexa de Transición Enerxética Xusta d’Asturies, la primer planificación autonómica nesti ámbitu y l’única que cuntó col asesoramientu de la Comisión Europea y de la Plataforma de Rexones Europees de Carbón en Transición. El documentu propón como oxetivu estratéxicu la descarbonización del modelu enerxéticu actual, basáu en combustibles fósiles, pa sustituyilu por otru sostenible, asitiáu nel despliegue de la enerxía renovable y l’impulsu de les capacidaes rexonales, cola mira de promover una transición xusta pal texíu productivo y la sociedá.

     

    El testu, publicáu n’Asturies Participa y na web de la Fundación Asturiana de la Enerxía (Faen),va tar en periodu d’información pública hasta’l 28 de mayu pa recibir aportaciones y suxerencies de la ciudadanía.

    La estratexa ye’l resultáu de los trabayos desenvueltos dende setiembre del 2019 pola Mesa Rexonal pa la Transición Enerxética, onde participaron el Gobiernu d’Asturies, Faen, la Universidá d’Uviéu, CSIC-INCAR, la Federación Asturiana d’Empresarios (Fade), los sindicatos CC. OO., SOMA-FITAG-UXT y UXT, representantes d’empreses electrointensives y enerxétiques, el Club de la Enerxía y les entidaes y agrupaciones representatives de los sectores implicaos.

    Esta fueya de ruta ta incardinada nel mapa rexonal d’estratexes d’especialización intelixente (S3), que ye’l documentu habilitante pa la recepción de fondos europeos, y tamién nel Plan Nacional de Transición Xusta, qu’habilita al empar pa optar al Fondu de Transición Xusta, que yá se ta trabayando col Gobiernu d’España, al traviés del Institutu pa la Transición Xusta (ITX).

    Alliniáu colos compromisos d’amenorgamientu progresivu d’emisiones contaminantes p’algamar la neutralidá climática nel 2050 na Unión Europea, el testu propón un horizonte temporal al 2030 pa entamar dende Asturies un modelu enerxéticu alternativu al basáu nel carbón y buscar opciones a partir de les fortaleces rexonales.

     

    Oxetivos estratéxicos y midíes

    Ún de los oxetivos estratéxicos empobínase a descarbonizar el modelu enerxéticu rexonal, al traviés de dos orientaciones prioritaries:

    • L’impulsu d’un modelu nuevu de suministru enerxéticu basáu na enerxía renovable y la diversificación tecnolóxica.
    • La promoción d’un sistema nuevu de consumu enerxéticu basáu na eficiencia y la electrificación.

    L’otru propósitu busca desenvolver la competitividá de les capacidaes d’Asturies pa promover una transición xusta en dos ámbitos:

    • Una transición que fortaleza’l texíu industrial aprovechando toles potencialidaes de la cadena de valor productiva y industrial, que suponga un impulsu d’actividaes nueves como l’hidróxenu, la enerxía marino eólico y lo terrestre, o la movilidá sostenible, y que promueva un ecosistema de xeneración del conocimientu y aguiye l’actividá económica en tolos territorios.
    • Una transición xusta centrada na ciudadanía, quier dicise, que xenere empléu, mengüe les desigualdaes y sofite a les persones más afectaes pola tresformación del sector enerxéticu.

    A partir de los conseyos de la Comisión Mista pa la Evaluación del Impactu de la Transición Enerxética n’Asturies y del análisis de posibilidaes, la estratexa propón el desenvolvimientu de 16 llinies estratéxiques y 63 midíes d’actuación. Destaquen estes:

    • Impulsar l’aprovechamientu d’enerxía renovable marino.
    • Promover la puesta en marcha de proyectos d’aprovechamientu de biomasa sostenible y d’altu valor añedíu.
    • Identificar el potencial de puntos de xeneración y aprovechamientu de calores industriales.
    • Optimizar l’aprovechamientu hidroeléctricu de la rexón.
    • Potenciar la renovación de les redes eléctriques.
    • Promover la puesta en marcha de proyectos demostrativos pa la producción y almacenamientu d’hidróxenu renovable o de baxes emisiones de carbonu.
    • Promover el desenvolvimientu d’una infraestructura básica de suministru de puntos de recarga de vehículu eléctricu y de combustibles alternativos nel tresporte.
    • Impulsar la puesta en serviciu de la planta de gas d’El Musel con nuevos vectores enerxéticos y usos, ente ellos l’hidróxenu.
    • Impulsar la minería sostenible asociada a la necesidá nueva de materies primes por cuenta de la transición enerxética.
    • Promover la puesta en marcha de proyectos de transición enerxética en territorios de transición xusta, aprovechando los sos recursos naturales, capacidaes industriales y l’alta formación de los sos trabayadores.

    Creación del Observatoriu Rexonal contra la Probeza Enerxética. 

     

    Audio (Pdf: 089 Kb)