Categories Navigation

Categories Navigation

El Principáu súmase a la celebración de la Selmana de l'Alministración Abierta p’averar la xestión pública a la ciudadanía

17/05/2021

- El programa va desenvolvese dende mañana hasta'l vienres y incluye cursos, seminarios, muestres de bones práctiques, vistes públiques, presentación d'encuestes y videoconferencies.

El Principáu súmase a la celebración de la Selmana de l'Alministración Abierta con un programa ampliu d'actividaes que se va desenvolver a partir de mañana y hasta’l vienres cola mira d'averar la xestión pública a la ciudadanía baxo los principios del gobiernu abiertu: tresparencia, rindición de cuentes, participación y collaboración.

Asturies súmase a la iniciativa mundial Open Gov Week qu'impulsa l'Alianza pal Gobiernu Abiertu (OGP) y que n'España enmárcase dientro de les acciones de formación, sensibilización y educación del IV Plan de Gobiernu Abiertu.

Asina, entamáronse distintos tipos d'eventos como cursos, seminarios, esposición de bones práctiques, vistes públiques, presentación d'encuestes, actos de promoción de la participación ciudadana y videoconferencies.

Nos años últimos, les democracies más avanzaes realizaron un esfuerciu importante p’abrir les instituciones a la ciudadanía, un propósitu que comparte'l Gobiernu d'Asturies. Con esti fin, l'Alministración autonómica foi avanzando n'aspectos como la tresparencia o la participación: nel 2017 diseñóse'l Llibru Blancu de la Participación y nel 2018 aprobóse la Llei de Tresparencia, Bon Gobiernu y Grupos d'Interés.

Anguaño, la sociedá asturiana tien la posibilidá d'acceder a un caudal importante d'información sobre l'Alministración al traviés del Portal de Tresparencia y tamién solicitar aquella que-y interese. Nos meses últimos, el Principáu compartió más de 1.300 conxuntos de datos nel portal de datos abiertos del Gobiernu d'España, polo que s'asitia como tercer comunidá autónoma en volume d'información.

Amás la ciudadanía tamién tien la posibilidá de realizar aportaciones a lleis, decretos y planes en procesu d'ellaboración al traviés del Portal de Participación.

 

Portales nuevos p'ameyorar l'accesu a la información

L'Executivu trabaya nos trés aspectos del gobiernu abiertu: tresparencia, participación y open data, p'ameyorar l'usu y l'accesu a la información, pa lo que ta desenvolviendo portales web nuevos que podríen entrar en funcionamientu nel segundu semestre.

Amás, anguaño prevése rematar el borrador de la Llei de Participación Ciudadana y avánzase na normativa de tresparencia, asina como nel plan estratéxicu d'esta materia.

Otra manera, va crease un Foru de Gobiernu Abiertu como espaciu d'alcuentru ente l'Alministración y la sociedá asturiana. Asina mesmo, lleváronse a cabu acciones formatives al traviés del Institutu Asturianu de l'Alministración Pública, un trabayu que va siguir nel ámbitu educativu. Igualmente, reforcióse la presencia del Principáu en redes nacionales y internacionales como OGP y trabáyase nuna Estratexa de Gobernanza Pública. 

 

Programa (Pdf: 477 Kb)