Categories Navigation

Categories Navigation

Ciencia abre’l procesu de contratación pa midir la velocidá d’internet per telefonía móvil a lo llargo de 541 carreteres asturianes

17/05/2021
  • El test va evaluar la rapidez de navegación pela rede, les redes sociales y los vídeos en streaming
  •  La conseyería acaba de sacar a llicitación esti proyectu, al traviés de la sociedad Xitpa, por 137.000 euros y un plazu de dos años

  

La Conseyería de Ciencia, Innovación y Universidá empieza’l procesu pa midir la calidá de la conectividá per telefonía móvil n’Asturies. El proyectu, qu’acaba de salir a llicitación por 137.000 euros y un periodu de dos años, va incluyir un chequéu de la velocidá de tresferencia d’archivos, calidá y velocidá de streaming de videu y redes sociales en cualquier puntu a lo llargo de 6.364 quilómetros.

Trátase d’un ‘Drive test’, una forma de monitorizar y evaluar el rindimientu del serviciu, que se va realizar en tola rede de carreteres nacionales y autonómiques: en total, 541 víes públiques que cubren la mayor parte del territoriu.

La sociedá Xestión d’Infraestructures Públiques de Telecomunicación del Principáu (Xitpa), que depende de la Conseyería de Ciencia, publicó los pliegos de llicitación, con un plazu de presentación de propuestes hasta’l 31 de mayu.

El procesu ye asemeyáu al qu’usa Google pa mapiar el territoriu. A lo llargo de cuatro meses un vehículu –o dellos, según calcue la empresa axudicataria- va percorrer la rede de carreteres con dispositivos de tolos operadores de telefonía móvil con rede propia y toles tecnoloxíes existentes: 2G, 3G, 4G y 5G.

La compañía axudicataria va chequiar en cada llugar pel que pase la carretera la velocidá de xubida y baxada de datos y la calidá de los servicios de navegación per internet. Por cada rede d’operador, van midise les páxines web qu’ocupen los puestos principales en visites: Google, Facebook, Twitter y Youtube pa los vídeos.  

El proyectu enmárcase na Estratexa de Tresformación Dixital na que trabaya la Dirección Xeneral d’Innovación y tien como oxetivu afitar o adaptar planes estratéxicos en zones con cobertura deficiente y que les compañíes conozan les necesidaes del territoriu, de cara a posicionase y ufiertar servicios. Además, va valir pa que la ciudadanía conoza la calidá de conectividá real qu’existe na so zona.

Pliegos de llicitación: https://cutt.ly/4bVGGtI