Categories Navigation

Categories Navigation

El Gobiernu d'Asturies publica nel Portal de Tresparencia un visor colos presupuestos autonómicos dende’l 2003

17/05/2021

- Esta ferramienta ayuda a consultar de forma fácil y interactiva la xestión contable del Principáu nos 18 años últimos.

- La midida enmárcase na Selmana de l'Alministración Abierta 2021.

El Principáu publicó güei nel Portal de Tresparencia un visor que recueye'l conteníu de tolos presupuestos xenerales autonómicos dende’l 2003 hasta’l 2021, coincidiendo cola celebración de la Selmana de l'Alministración Abierta 2021.

Al traviés d'esta ferramienta, cualquier persona puede acceder de manera cenciella y comprensible a la información rellacionada colos ingresos y gastos del Gobiernu d'Asturies y ver la so evolución al traviés de gráfiques. Los datos yá taben primeramente a disposición de la ciudadanía n'otros formatos.

El visor ayuda a consultar de forma fácil, interactiva y atractiva tola información presupuestaria como los gastos y ingresos, los desgloses económicos y por programa y área de gastu. Asina, puede vese, por exemplu, la variación de los programes presupuestarios y la preeminencia de la inversión en salú na comunidá.

“El visor presupuestariu nuevu va dexar a la ciudadanía entender meyor los presupuestos autonómicos, analizar la so evolución, asina como les prioridaes de los socesivos gobiernos. L'accesu a estos datos d'una manera cenciella supón una meyora y una muestra más del compromisu del Executivu colos principios de Gobiernu Abiertu”, indicó la conseyera de Presidencia, Rita Camblor.

La previsión del Principáu ye siguir lliberando datos en formatos visualmente atractivos y fáciles d'entender nos meses vinientes, aprovechando'l desenvolvimientu de los portales nuevos de Gobiernu Abiertu.

Accesu al visor nuevu: https://transparencia.asturias.es/web/gobierno-abierto/detalle?articleId=2653114&p_r_p_categoryId=694576