Categories Navigation

Categories Navigation

El Principáu empieza’l procesu pa reforzar la so participación na Zalia y impulsar la plataforma loxística rexonal

18/05/2021

- El Gobiernu d’Asturies va pidir permisu a la Xunta Xeneral al traviés d’una iniciativa llexislativa.

- La reestructuración societaria ye un pasu previu pa incorporar capital nuevo y a la empresa pública estatal Sepides .

El Gobiernu del Principáu, sociu mayoritariu de la Zona d’Actividaes Loxístiques d’Asturies (Zalia), los puertos de Xixón y Avilés y los conceyos de dambos conceyos alcordaron güei empezar el procesu pa reestructurar la composición accionarial de la sociedá y ameyorar la so situación financiera. L’Executivu autonómicu quier reforzar la so participación na entidá cola mira de dotala de solvencia financiera y rematar les obres pendientes, amás de les actuaciones empobinaes a convertir esta área nuna plataforma loxística líder del noroeste y asitiar Asturies como exa del Arcu Atlánticu. P’acometer esti procesu va solicitar permisu a la Xunta Xeneral al traviés d’una iniciativa llexislativa.

En concreto, los socios alcordaron capitalizar los importes apurríos hasta’l 31 d’avientu pasáu y financiar los pendientes a partir de xineru del 2021. D’esta operación pa tresformar la deuda en capital social va resultar una estructura accionarial nueva onde’l Principáu pasaría de tener una participación mayoritaria del 40 % a otra del 86,28 %. Pela so parte, el Conceyu de Xixón caltendría una representatividá persasemeyada a la que yá ostentaba, con un 9,54 %, mentes que la participación de los demás socios baxaría: quedaría nun 2,79 % y un 1,21 % nel casu de les autoridaes portuaries de Xixón y Avilés, respectivamente, y un 0,18 % pal Conceyu d’Avilés.

Esta foi una de les propuestes trataes esta tarde na xunta del conseyu d’alministración de la sociedá, presidida pol conseyeru de Medio Rural y Cohesión Territorial, Alejandro Calvo, y onde tamién participó pol Gobiernu d’Asturies el viceconseyeru d’Infraestructures, Movilidá y Territoriu, Jorge García.

Calvo, na so calidá de presidente, esplicó que pa que’l Principáu garre una posición mayoritaria na sociedá, la Xunta Xeneral tien d’aprobar enantes una llei que lo autorice. El conseyeru tamién indicó que’l proyectu normativu va unviase al Parllamentu pal so debate, pa lo que se van empezar nel intre los contactos políticos colos grupos parllamentarios.

El refuerzu de la estructura societaria ye un pasu previu determinante pa incorporar a esta iniciativa capital nuevo y a la empresa pública estatal Sepides y rematar les inversiones previstes na primer fase del polígonu allugáu en San Andrés de los Tacones -en particular, la construcción d’una subestación que dote d’enerxía eléctrico a les parceles- y empezar la comercialización de los terrenos.

 

Audio (Mp3: 912 Kb)