Categories Navigation

Categories Navigation

El Principáu empieza la ellaboración d’una llei p’ameyorar la xestión de los puertos

18/05/2021

- El Gobiernu d’Asturies convida a cofraderíes, clubes y interesaos potenciales a participar na redacción de la norma, que va favorecer el desenvolvimientu de la rede portuaria autonómica
 
La Conseyería de Mediu Rural y Cohesión Territorial empezó’l procedimientu pa ellaborar una llei autonómica que dexe ameyorar la xestión de los puertos asturianos y tenga en cuenta les sos particularidaes, sobre manera les condiciones singulares de les villes costeres.
 
El conseyeru Alejandro Calvo esplicó güei na Xunta Xeneral que con esta regulación, que’l so anteproyectu yá se pue consultar nel portal de Tresparencia del Gobiernu d’Asturies (tresparencia.asturias.es), el Principáu cunta integrar nun solu documentu la ordenación, los usos y el réxime sancionador de los puertos.
 
La norma va dexar superar la falta d’una llexislación propia, qu’obliga a recurrir a distintes normes, como la Llei 22/1988 de Costes y a otres llexislaciones portuaries o de tases y precios públicos non adaptaes a la realidá de puertos de mena non comercial, como los d’Asturies.
 
Pela so parte, la directora xeneral d’Infraestructures Viaries y Portuaries, Esther Díaz, unvió una carta a cofraderíes de marineros, clubes deportivos, otres organizaciones representatives y interesaos potenciales pa informalos sobre la tramitación de la normativa. Na misiva, que van recibir estos díes, píde-yos que collaboren coles sos aportaciones pa que la redacción seya participada y el testu resultante dexe xestionar estes infraestructures de manera más eficiente, tresparente y segura. Les suxerencies al anteproyectu puen presentase a lo llargo d’un mes, prorrogable.
 
“Una normativa única pa la xestión de los puertos implica cuntar con un sofitu llexislativu afechu a les situaciones qu’anguaño se producen nos nuestros puertos, amás de con mayor tresparencia na xestión d’estos espacios”, valoró Díaz.
 
  
La llei futura busca estos oxetivos:

  • Regular los puertos asturianos de titularidá autonómica de manera integral y más afecha a les sos peculiaridaes.
  • Regular la interacción qu’existe ente’l puertu y la villa costera de la que ye parte, amás d’ameyorar la coordinación cola Alministración local y otros sectores qu’operen nellos.
  • Fomentar l’actividá económica y el desenvolvimientu nes villes costeres.
  • Promocionar la sostenibilidá ambiental y l’adaptación al cambéu climáticu de puertos y actividaes portuaries.

De la qu’avance’l procesu, responsables de la conseyería van celebrar xuntes y van programar visites a les principales villes costeres pa intercambiar opiniones, informar y debater sobre los conteníos que va incluyir la norma. 

  - Declaraciones Consejero de Medio Rural y Cohesión Territorial (Mp3: 844 Kb)