Categories Navigation

Categories Navigation

El plan de choque de Derechos Sociales va adaptar el sistema de dependencia vixente al modelu d'atención centráu na persona

18/05/2021

- La conseyería que dirixe Melania Álvarez reduz a la metá les llistes d'espera en valoraciones y reconocencia de prestaciones y llogra esaniciar dafechamente les de les árees II y IV.

El plan de choque qu'impulsa la Conseyería de Derechos Sociales y Bienestar va dexar adaptar el sistema de dependencia actual, vixente dende’l 2007, al modelu d'atención nuevu centráu na persona, que busca afaer los recursos y prestaciones a les necesidaes de cada individuu.

La conseyera Melania Álvarez recordó esta mañana nel plenu de la Xunta Xeneral que'l plan, el primer compromisu de llexislatura del so departamentu, púnxose en marcha en setiembre del 2019. “De magar, amenorguemos a la metá les llistes d'espera, tanto en valoraciones como en reconocencia de prestaciones, y esaniciemos les de les árees II y IV”, sorrayó la titular de Derechos Sociales.

L’área II incluye los conceyos de Tinéu, Cangas, Ayande, Ibias, Degaña, mentes que la IV ta compuesta polos d'Uviéu, Siero, Noreña, Salas, Candamu, Les Regueres, Grau, Tameza, Llanera, Sariegu, Cabranes, Nava, Bimenes, Santu Adrianu, Proaza, Teberga, Quirós, La Ribera, Morcín, Riosa, Miranda y Somiedu.

Amás, señaló que l'Observatoriu Estatal de Dependencia avaló “la eficaz xestión” del Gobiernu d'Asturies nesta materia. “L'órganu reconoció que'l Principáu creció como nenguna otra comunidá n'atención a les persones dependientes, al pasar de llograr la peor nota ente les distintes autonomíes a ufiertar el mayor porcentaxe de medría de toes elles nel añu últimu”, valoró la conseyera.

El plan de choque encara agora la so última fase, que engloba la revisión total del procedimientu, diseñáu nel 2007, p'afaelu a les necesidaes nueves. Esti análisis va dexar consiguir mayor axilidá, incorporar l'usu de tecnoloxíes nueves, evitar duplicidaes, esaniciar cargues burocrátiques y afaer el mecanismu al modelu d'atención centrada nes persones.

Per otra parte, el decretu nuevu establez un procedimientu únicu pa la reconocencia de la situación de dependencia y del derechu a les prestaciones, asitia a los profesionales especializaos como emplegaos públicos de referencia y centraliza la tramitación na Alministración autonómica en toles sos fases. Amás, abre la vía telemática pa facilitar l'accesu al sistema de dependencia, de la que consolida la xestión d'urxencia en determinaes situaciones y garantiza un meyor siguimientu de l'atención.