Categories Navigation

Categories Navigation

El Bancu de Lleche Materno d’Asturies facilitó l’alimentación de 334 recién nacíos prematuros o enfermos en 4 años

19/05/2021
  • 194 madres entregaron 1.157 litros a esta unidad dende la so creación en 2017 
  • Les autoridaes sanitaries agradecen la xenerosidá d’estas muyeres con motivu del Día Mundial de la Donación de Lleche Materno
     

El Bancu de Lleche Materno d'Asturies, allugáu nel Serviciu de Neonatoloxía del Hospital Universitariu d'Asturies (HUCA), recibió nos postreros cuatro años 1.157 llitros de lleche que beneficiaron a 334 neonatos, la mayoría grandes prematuros, esto ye, ñácaros que nacen antes de les 32 selmanes de xestación y/o con un pesu inferior a 1.500 gramos.

En total, 194 madres, con una edá media de 34,7 años, donaron lleche. La mayoría d'elles cunten con estudios universitarios y tuvieron un embaranzu previu. D'ente toles donantes, 47 tuvieron a los sos fíos ingresaos en Neonatoloxía; los fíos de 17 d'elles fueron receptores de lleche materno pasteurizada y 7 tuvieron neños finaos.

La mayoría d'elles donaron nel HUCA, sacante 17 madres qu'apurrieron lleche nel Hospital Universitariu de Cabueñes, en Xixón, y 6 nel Hospital Universitariu San Agustín d'Avilés. Dambos equipamientos sanitarios funcionen como centros satélites del bancu dende 2019.

No que va d’añu, 30 neonatos fueron alimentaos con lleche donada, 6 d'ellos nel Hospital Universitariu de Cabueñes. Hasta agora, 19 madres apurrieron 116,6 llitros.

La pandemia provocó un menor númberu de nueves donantes, anque'l volume d'entrega caltúvose. Ello ye que l'añu pasáu 23 madres donaron 189 llitros, menos de la metá qu'en 2019, cuando 48 donantes apurrieron 203 llitros. En 2020, beneficiáronse 75 neonatos y 84 en 2019.

El coordinador del Bancu de Lleche Materno d'Asturies, Enrique García López, recuerda que la donación de lleche materno ye “un actu d'arrogancia y solidaridá que permite ameyorar la supervivencia d'estos neños”.

Con motivu del Día Mundial de la Donación de Lleche Materno, la Conseyería de Salú y el Bancu de Lleche Materno d'Asturies agradecen a toles donantes y les sos families l'esfuerzu que realicen al compartir la so lleche con naciellos prematuros y enfermos que nun pueden recibila de les sos madres. Tamién animen a les muyeres que tean dando de mamar adecuadamente los sos fíos a que se pongan en contactu nos siguientes númberos de teléfonu si quieren donar:

  • Bancu de Lactancia Materno d'Asturies (HUCA): 985 652 456.
  • Hospital Universitariu de Cabueñes: 607 478 658.
  • Hospital Universitariu San Agustín d'Avilés: 985 123 000 (estensión 24008).

El Bancu de Lleche Materno encárgase de promover la lactancia materna y la donación de lleche, escoyer donantes, recibir lleche crudo, almacenalo, pasteurizarlo y distribuyilo a aquellos neonatos que lo precisen ingresaos nes Unidaes de Neonatoloxía del HUCA y del Hospital Universitariu de Cabueñes.

La Organización Mundial de la Salú señala que'l meyor alimentu pa un naciellu ye la lleche materno, especialmente en casos de neños prematuros o enfermos, porque los protexe de problemes intestinales graves, mengua'l riesgu d'infección y ameyora les posibilidaes de recuperación, supervivencia y desenvolvimientu.

De siguío, recuéyense los testimonios de delles madres donantes de lleche:

  • Isabel Solís Cienfuegos: “El procesu de donación foi bien senciellu y rápidu. El personal del Bancu de Lleche Materno del HUCA faite les coses bien fáciles. Cuando m’incorporé al trabayu punxime en contactu con ellos. Fixéronme una entrevista y una analítica, y nun par de díes pudi empezar a donar. Facía les estracciones nuna parada mientres el trabayu, etiquetaba los mios botes y dexába-yos la lleche ellí. Recoyía más botes y más pegatines y asina tuvimos seis meses”. “Al terminar el procesu de donación llegóme una carta del Bancu de Lleche diciéndome la cantidá total que donara y a cuántos ñácaros ayudara directamente. ¡Fíxome ilusión abondo!”
  • Naima Ruiz Farrouh: La pandemia y el confinamientu marcó la evolución del embaranzu de Naima Ruiz, que dio a lluz el 13 de xunetu. Una hemorraxa pospartu y que'l so fíu nació con una anquiloglosia provocó que nun pudiera dar de mamar al so fíu como taba previsto y decantóse pola lactancia diferida. “De magar, vivo conectada a una máquina qu'estrai la lleche que produzo”, esplica. Naima fíxose donante cuando se dio cuenta que la so producción yera superior a la demanda del so ñácaru: “Donar lleche ye una fonte constante de felicidá. Nun puedo nin imaxinar lo tien de suponer pa unos padres enfrentase a la complexa realidá de la prematuridad. Toa ayuda ye poco y donar lleche ye daqué que bien fácilmente podemos facer, siempre que la muyer cunte con esa posibilidá”, señala.
  • María Prado Areces: María Prado perdió al so fíu Marco va dos años, hores depués d'empezar la lactancia. “Tres la so muerte, col dolor que tenía pola perda del mio ñácaru, informáronme sobre la donación de lleche y aporté ensin pensalo”, señala. Reconoz que creyó que la estracción de la lleche diba ser más senciella: “Foi bastante complicao, polos sentimientos atopaos, la cantidá de llárimes echando de menos al mio ñácaru… Entós empecé a pensar en cada toma que m'estrayía que Marco yera un héroe y que gracies a la so lleche diba salvar a dalgún ñácaru y esi pensamientu empezó a dame fuerza y cierta tranquilidá”. Agora, María vuelve tar embarazada: “Sé que volveré donar otra vegada pase lo que pase, porque foi la meyor decisión tomada nel peor momentu de la mio vida”.

Audio [Mp3: 2.3 MB]