Categories Navigation

Categories Navigation

El Gobiernu d'Asturies empecipia'l procesu pa ellaborar una llei integral que potencie la cohesión territorial de la comunidá

19/05/2021

   La Conseyería de Mediu Rural empecipia un ambiciosu procesu de participación pa tener un anteproyectu consensuáu en 2022

El primer borrador ta yá disponible nel portal Asturies Participa pa consultes y aportaciones mientres dos meses

El conseyeru Alejandro Calvo señala que la norma tien de sentar los cimientos del futuru
 
      
La Conseyería de Mediu Rural y Cohesión Territorial empecipió esti mes el procesu pa la ellaboración d'una Llei d'Ordenación Integral del Territoriu n'Asturies (LOITA) que va sustituyir la normativa vixente. El testu va sirvir como marcu pa integrar les distintes polítiques qu'afecten al territoriu y adaptales a la realidá socioeconómica actual, bien distinta a la de va dos décades, cuando s'aprobó la lexislación.
 
El conseyeru Alejandro Calvo y la directora xeneral d'Ordenación del Territoriu y Urbanismu, Sonia Puente Landázuri, esplicaron en rueda de prensa que la redacción de la nueva norma va facilitar encarar retos como'l diseñu d'una estratexa pal desenvolvimientu sostenible del territoriu que rellacione l’área metropolitana y los conceyos rurales de les nales con una visión comarcal. Tamién va permitir simplificar los trámites qu'han de realizar les alministraciones y la ciudadanía, lo que va implicar encurtiar plazos p'autorizar un usu o actividá, de cuenta que se va favorecer l'actividá económica y l'empléu, mesmo que la fixación de población.
 
Al tiempu, la LOITA va tener en cuenta factores como la rexeneración de los núcleos rurales y urbanos, el fomentu de la rehabilitación de viviendes, la preservación del suelu agroforestal y la sostenibilidá, amás del cuidáu del mediu ambiente, con midíes tendentes a apangar y adaptar el territoriu a los efectos del cambéu climáticu.
 
Pa incorporar estos fines na redacción de la norma, el Gobiernu d'Asturies cunta cola collaboración de la Universidá d'Uviéu, cola qu'a finales de 2020 robló un conveniu dotáu con 50.000 euros. L'equipu redactor ta lideráu pola directora Sonia Puente, arquitecta y urbanista, mesmo que profesionales de reconocíu prestíu como'l catedráticu de Derechu Alministrativu Alejandro Huergo y l'arquiteutu urbanista Sebastià Jornet.
 
Participación ciudadana
 
Apocayá abrióse el primer procesu de participación ciudadana, que busca implicar a los distintos axentes sociales, económicos y políticos na redacción d'un testu que va tener gran trescendencia nel caltenimientu, usu y esfrute del territoriu. “Ye una llei que tien de representanos a toos y a toes, por eso ha llexitimase nel procesu previu a la tramitación parlamentaria”, indicó la directora xeneral.
 
El primer borrador del anteproyectu de llei yá puede consultase na páxina web Asturies Participa (www.asturiasparticipa.es), onde va tar disponible nun períodu de dos meses. El Principáu tamién tien en marcha anguaño nesi portal otres iniciatives normatives, como la primer llei pa los puertos autonómicos.
 
Nos últimos meses, dende la Dirección Xeneral d'Ordenación del Territoriu y Urbanismu programáronse distintes xuntes colos conceyos pa informalos, ente otres cuestiones, del cambéu de la normativa. Paralelamente, en collaboración col Institutu d'Alministración Pública Adolfo Posada, ta celebrándose un ciclu de 8 xornaes d'urbanismu comparáu, interesantes p'analizar les esperiencies qu'otres comunidaes desenvuelven pa ordenar y xestionar el so territoriu.
 
La conseyería envalora que la ellaboración del proyectu de llei, con dos periodos de consultes públiques, va enllargase aproximao un añu, talmente que en 2022 va cuntase  con un anteproyectu consensuáu previu al trámite alministrativu y parllamentariu que tien de siguir cualesquier norma.


 Declaraciones (Mp3: 2,5 Mb)