Categories Navigation

Categories Navigation

La Sociedá Rexonal de Promoción llanza la primer convocatoria del Fondu Asturias Startup pa financiar proyectos innovadores

20/05/2021


  • Esta ferramienta nueva dispón d’un presupuestu de 4,5 millones y cunta sofitar 10 diez idees empresariales anguaño.
  • Los empréstamos van tener como garantía namás la viabilidá técnica y económica de la iniciativa y la implicación de los promotores.
  • El plazu de presentación va tar abiertu hasta’l 20 de xunu .

El conseyeru d’Industria, Empléu y Promoción Económica, Enrique Fernández, presentó güei’l Fondu Asturies Startup, dotáu con 4,5 millones y empobináu a empreses emerxentes (startups) asturianes coles mires de financiar proyectos altamente innovadores. Trátase d’una ferramienta nueva de sofitu financieru impulsada pol Gobiernu d’Asturies al traviés de la Sociedá Rexonal de Promoción (SRP).

El fondu contempla’l financiamientu de startups en dos etapes: la de llanzamientu y validación del modelu de negociu, productu o serviciu, onde puen llograr hasta 100.000 euros, y la fase de medría, desque demostraren tracción de mercáu. Nesti últimu casu, el creitu máximu va poder algamar los 200.000 euros.

La ferramienta financiera articúlase al traviés d’empréstamos participativos ensin comisiones d’apertura, estudiu, amortización antemanada y ensin otres garantíes que la viabilidá técnica y económica del proyectu y la competencia y implicación del equipu promotor. Los promotores puen presentar proyectos hasta’l 20 de xunu.

El Fondu Asturies Startup sofítase nun comité asesor compuestu por espertos de sonadía reconocida nos ámbitos empresarial, inversor, d’innovación y tecnolóxicu que van trabayar conxuntamente cola SRP na selección de los proyectos susceptibles d’optar a financiamientu. Toos s’enfoten na capacidá d’Asturies p’atrayer proyectos altamente innovadores qu’ayuden a la diversificación del texíu productivo.

Na so intervención, el conseyeru d’Industria valoró “la versatilidá de la Sociedá Rexonal de Promoción por poner nel mercáu un productu financieru que cunta con condiciones bien favorables pa los promotores, al nun riquir más garantíes que la viabilidá técnica y económica del proyectu y la competencia y implicación del equipu xestor”.

Tamién participó na xornada’l director xeneral d’Innovación, Investigación y Tresformación Dixital del Principáu, Iván Aitor Lucas del Amo, qu’aseguró que cola puesta en marcha del Fondu Asturies Startup “danse los pasos pa complementar les llinies de financiamientu actuales pa la creación d’empreses nueves y iniciatives de base tecnolóxiques”. “Va ser ensin dulda un sofitu importante pal nuestru texíu innovador”, afirmó.

Pela so parte, Eva Pando, presidenta de la SRP y directora xeneral del Idepa, sorrayó’l sofitu integral que reciben les empreses emerxentes pol Grupu Idepa. “Esi sofitu ufiértase de manera agrupada al traviés de Start in Asturies y de la web creada pa eso (www.startinasturias.es) y refléxase nel asesoramientu qu’empresta’l Centru Européu d’Empreses y Innovación, el financiamientu qu’ufierten la SRP, Idepa y Asturgar y l’asistencia a la internacionalización al traviés d’Asturex”, rellató.

 

Captación de proyectos innovadores

El Grupu Idepa, al traviés de les distintes entidaes que lu formen, cumple un llabor fundalmental na captación de proyectos innovadores. Asina, el Centru Européu d’Empreses y Innovación (CEEI) ye’l puntu d’entrada pa les startups, a les qu’ufierta asesoramientu y acompañamientu. La so actividá favoreció la creación de 182 empreses de base tecnolóxica ente’l 2000 y el 2020. Amás, ufiertó asesoría a 575 proyectos.

Per otru llau, l’Institutu de Desenvolvimientu del Principáu (Idepa) cunta con programes de financiamientu pa compañíes de base tecnolóxica. Estes ayudes dexaron ente’l 2015 y el 2020 desenvolver 75 proyectos altamente innovadores que xeneraron inversiones por valor de 7,7 millones.

Amás, Asturgar punxo en marcha xunto a la SRP una llinia d’oportunidaes nueves que facilita soporte financieru pa proyectos industriales.

Como complementu a estes midíes, Asturex y el CEEI llanzaron anguaño la segunda edición de l’Aceleradora pa la Internacionalización Quick Global, un programa onde empreses tecnolóxiques nueves puedan impulsar el so procesu de medría y internacionalización. Na primer edición desenvolviéronse 17 proyectos, 8 d’ellos de creación nueva.