Categories Navigation

Categories Navigation

El Principáu, el Conceyu de Llaviana y la Delegación del Gobiernu conderguen l'asesinatu por violencia de xéneru de María Teresa Aladro Calvo

20/05/2021
  • Trátase de la primer víctima mortal por esta causa na comunidá autónoma no que va d'añu .
  • Les trés instituciones convoquen una concentración de repulsa énte'l consistoriu llavianés mañana, vienres, a les 11:00 hores .

El Gobiernu del Principáu, el Conceyu de Llaviana y la Delegación del Gobiernu n'Asturies manifiesten el so más enérxica condena y la so fonda consternación pol asesinatu de María Teresa Aladro Calvo en La Pola (Llaviana). Trátase del primer episodiu mortal por violencia de xéneru rexistráu n'Asturies esti añu. Nel momentu de los fechos nun existía nenguna denuncia contra'l deteníu, expareja de la finada, nin midíes de protección pa la víctima.

N'España, col asesinatu de María Teresa, contabilícense trece víctimes mortales por violencia de xéneru esti añu y 1.091 dende 2003, añu nel qu'empezaron a rexistrase los datos oficiales. A estes cifres hai que sumar dos menores asesinaos en 2021 y 39 dende 2013.

Les trés alministraciones, según el Conseyu Asturianu de la Muyer y el Conseyu Municipal de Muyeres de Llaviana, treslladen les sos condolencirs a la familia y amistaes de la víctima, a quien ufierten los servicios d'asesoramientu xurídicu y sofitu previstos para estes situaciones. Amás, tresmiten a la sociedá asturiana la necesidá d'un compromisu colectivu p’acabar con esti tipu de violencia y de perseverar énte esti pergrave déficit de llibertá y seguridá que s'exerz sobre les muyeres.

El Principáu, el Conceyu de Llaviana y la Delegación del Gobiernu convocaron una concentración de repulsa énte'l consistoriu llavianés mañana, vienres, 21 de mayu, a les 11:00 hores. Les trés instituciones conviden a participar a tola ciudadanía pa espresar el refugu unánime de la sociedá asturiana a la violencia contra les muyeres.