Categories Navigation

Categories Navigation

El Gobiernu d’Asturies publica la Llei de Tresparencia en llinguaxe accesible pa facilitar la so comprensión a tola ciudadanía

21/05/2021
  • El testu resumióse de manera cenciella cola collaboración de colectivos en defensa de la inclusión .
  • Esta midida enmárcase na Selmana de l’Alministración Abierta 2021 qu’impulsa’l Principáu.

El Gobiernu d’Asturies publicó nel Portal de Tresparencia una versión de la Llei 8/2018, de Tresparencia, Bon Gobiernu y Grupos d’Interés, en llinguaxe accesible. El testu llexislativu autonómicu resumióse de manera cenciella, de forma que facilita la comprensión por tola ciudadanía, incluyíes les persones con problemes cognitivos o discapacidá intelectual.

Pa llevar a cabu esta actuación, que s’enmarca na Selmana de l’Alministración Abierta 2021, el Principáu collaboró cola entidá Plena Inclusión, que sometió’l testu a la revisión de persones con distintos tipos de discapacidá cola mira de comprobar la so adaptación correcta al llinguaxe inclusivu.

La complexidá de les normes alministratives estorba la so comprensión poles persones con problemes cognitivos o discapacidá intelectual, que ven amenorgaes les sos posibilidaes pa exercer los sos derechos, en parte, poles barreres d’accesu a la información. Por esi motivu, la Dirección Xeneral de Gobernanza Pública, Tresparencia, Participación Ciudadana y Axenda 2030 quixo facilitar una versión de la llei autonómica adaptada a estos colectivos.

“Una Alministración abierta nun escluye a una parte de la sociedá. Les persones con discapacidá tienen los mesmos derechos que les demás y han tener les mesmes posibilidaes d’exercelos. Esi ye ún de los grandes retos si queremos una sociedá y una democracia realmente inclusives coles que les persones se sientan identificaes y comprometíes”, destacó la conseyera de Presidencia, Rita Camblor.