Categories Navigation

Categories Navigation

El Principáu conmemora en Los Picos d’Europa y Redes los díes internacionales de la diversidá biolóxica y los parques naturales

21/05/2021

Un momento de la visita

  • Dambos espacios van acoyer el domingu actividaes pa divulgar la so biodiversidá y concienciar sobre la importancia de la conservación.

El Parque Nacional de Los Picos d’Europa y el parque natural y reserva de la biosfera de Redes, dos de los espacios protexíos de la Rede Natural d’Asturies, van ser los protagonistes de les actividaes entamaes pa conmemorar el Día Internacional de la Diversidá Biolóxica y el Día Européu de los Parques Naturales. Dambes efemérides, que se celebren con malpenes un día de diferencia, ponen en valor el patrimoniu natural y conciencia sobre la importancia del so caltenimientu.

Les actividaes tán empobinaes a tolos públicos y van desenvolvese esti domingu, día 23, de forma simultánea nos centros de recepción del visitante Pedro Pidal, nel Parque Nacional de Los Picos d’Europa, y la Casa del Agua, nel Parque Natural de Redes. L’oxetivu de los actos programaos ye dar a conocer estos espacios, la so biodiversidá y les especies qu’habiten nellos.

En cada espaciu van entamase visites guiaes de calter divulgativu pa grupos pequeños que van cumplir toles midíes de seguranza y los protocolos sanitarios. Asina, van incluyir una presentación del centru y de la zona onde s’alluga, amás d’una ruta interpretativa pela contornada, onde van poder observase los ecosistemes.

Les visites va realizase en cuatro turnos, ente les 10:00 y les 13:00 hores, y van tener una duración d’alredor de 50 minutos. Les persones interesaes puen apuntase llamando al 629 78 35 68, si quieren dir a l’actividá del centru Pedro Pidal, y al 610 57 43 20 si quieren asistir a la de la Casa del Agua.

El Día Internacional de la Diversidá Biolóxica celébrase mañana, 22 de mayu, por decisión de la ONU, pa coincidir col aniversariu de l’aprobación del Conveniu sobre la Diversidá Biolóxica firmáu en 1992. Anguaño, el lema escoyíu ye Soi parte de la solución, una continuación de la campaña 2020 Les nuestres soluciones tán na naturaleza.

El Día Européu de los Parques Naturales ta promovíu pola Federación Europarc y celébrase cada 24 de mayu pa recordar la declaración del primer parque nacional européu en Suecia en 1909. Anguaño conmemórase col lema Parques: la xeneración viniente, coles mires d’abrir el debate sobre cómo estos espacios tienen que se repensar pa contribuyir a una Europa más verde, onde les árees protexíes seyan pieces claves de les polítiques publiques.


Declaraciones DG