Categories Navigation

Categories Navigation

Les interrupciones voluntaries del embaranzu baxaron un 11,7 % nel 2020

24/05/2021
  • Los albuertos baxen más nos grupos d'edá de 15 a 19 y de 30 a 34 años, al menguar la interacción pol confinamientu
  • El Principáu considera prioritaries les midíes pa garantizar la salú sexual de la población

 

El númberu d'interrupciones voluntaries del embaranzu (IVE) realizaes n'Asturies nel 2020 establecióse en 1.842, lo que supón un descensu del 11,7 % al respective del rexistráu al añu anterior, nel que se practicaron 2.087. Asina se constata nel boletín últimu de Inform_Acciones publicáu pol Observatoriu de la Salú del Principáu (OBSA).
El confinamientu ente los meses de marzu y mayu del añu pasáu tuvo un impactu directu nel númberu d'albuertos, especialmente ente la población moza, al amenorgase la interacción social.

A partir de xunu volvió aumentar hasta les cifres habituales, que se caltuvieron estables el restu del añu.

El porcentaxe d'albuertos amenorgó un 9,3 % al respective del periodu 2017-2019, trieniu nel que les cifres fueron homoxénees. La baxada ye notable nos grupos d'edá de 15 a 19 y de 30 a 34 años, con un 18,1 % y 14,1 %, respectivamente.
Los grupos etarios que caltienen les mayores tases son los de 20 a 24 (20,33 por cada mil muyeres) y de 40 a 44 (4,54 por cada mil muyeres), prácticamente idéntiques a les d'años anteriores.

L'informe reflexa que nun se detecten diferencies grandes no que fai al momentu d'interrupción del embaranzu al respective d’años anteriores, yá que de  manera xeneral prodúcense na selmana 7,6 de xestación.

El Principáu considera altes les actuales tases d'albuertu, polo qu'insiste na importancia de les midíes pa garantizar la salú sexual de la población en xeneral y de la mocedá en particular. Ye menester recordar qu'esta ye una de les llinies prioritaries del Plan de Salú del Principáu d'Asturies 2019-2030: poblaciones sanes, persones sanes.

Nesti sentíu, les autoridaes sanitaries encamienten universalizar la educación sexual nos centros educativos y sanitarios cola mira de garantizar el bienestar presente y futuru de los adolescentes, asina como l'accesu a métodos anticonceptivos. Pa llograr esti oxetivu, ye preciso poner en marcha estratexes que faciliten la gratuidá d'estos medios, mesmo que la so conocencia, pa que pueda facese usu d'ellos.

Estes dos midíes, xunto con otres qu'impliquen a entidaes sociales y al ámbitu comunitariu, son claves pa fomentar la salú sexual, llograr que baxen les interrupciones voluntaries del embaranzu y protexer los derechos sexuales.

 

Consultar l'informe del OBSA (pdf: 664 Kb)