Categories Navigation

Categories Navigation

Les esbardes reintroducíes en Redes y en Los Picos d’Europa presenten bona traza y siguen afaciéndose a la redolada

24/05/2021

osezna

  • Les zones de les sueltes escoyéronse depués d’analizar variables como la disponibilidá d’alimentu y la poca presencia de persones .

Les osines reintroducíes nel Parque Natural de Redes y nel Parque Nacional de Los Picos d’Europa nel mes d’abril pasáu y en payares del 2019, respectivamente, presenten bona traza y aclimátense a la so redolada nueva con normalidá, según constataron los axentes de la guardería del Mediu Natural que realicen una vixilancia activa de los esbardos.

Les zones de les sueltes escoyéronse depués d’analizar munches variables, como la disponibilidá d’alimentu y la poca presencia de persones, y coles mires d’ayudar a conectar la población osero d’estes árees, non mui numberosa, colo del occidente, muncho más estabilizao. Na progresión de la población occidental resulta vital el sofitu de les comunidaes locales onde esta especie forma yá parte indisoluble del so territoriu y del so desenvolvimientu socioeconómicu.

Una de les críes recoyérese a últimos d’agostu del 2020 na contorna del pueblu d’Éndriga, en Somiedu. L’esbardu presentaba hipotermia, hipoglucemia, un pesu mui per debaxo de lo normal pa la so edá, unos 6,5 quilos, amás de mancadures cutánees de tipu infecciosu en munches partes del pelleyu. En xeneral, el so estáu de salú yera delicáu. Desque recuperó, soltóse n’abril na Reserva de la Biosfera de Redes.

Pela so parte, la osa reintroducida en payares del 2019 nel Parque Nacional de Los Picos d’Europa recoyérese na contorna de Sabadía, nel conceyu de Santu Adrianu, en mayu d’esi mesmu añu. Carecía de desnutrición, deshidratación y alteraciones neurolóxiques.

Dambes osines treslladáronse, desque estabilizaron, al Centru de Recuperación de la Fauna Montés del Gobiernu de Cantabria pa siguir col so restablecimientu. Depués, lleváronse al Centru de Valsemana, en Llión, un espaciu en semilibertá onde permanecieron hasta la so reintroducción nos espacios naturales d’Asturies.

Les alministraciones d’Asturies, Cantabria, Castiella y Llión y el Ministeriu pa la Transición Ecolóxica caltuvieron una collaboración intensa y constante en tol procesu, lo qu’ayudó a actualizar los protocolos de rehabilitación, sedación, radiomarcaxe, treslláu y lliberación de críes d’osu pardu; un trabayu de gran utilidá de cara a casos asemeyaos.