Categories Navigation

Categories Navigation

El Gobiernu d’Asturies invirtió 7,4 millones n’obres de rehabilitación, reparación y meyora del parque públicu de vivienda nel 2020

24/05/2021

Un momento de la visita

  • 5.526 asturianos accedieron a pisos o a una ayuda al arriendu.
  • La renta media de los inquilinos de Vipasa mengua hasta asitiar en 77 euros al mes.
  • La conseyera Melania Álvarez apurre les llaves de cinco inmuebles en Villaviciosa y destaca’l llabor social lleváu alantre na pandemia pola empresa rexonal.

El Gobiernu d’Asturies invirtió l’añu pasáu 7,4 millones pa llevar a cabu obres de meyora, rehabilitación y arreglu en 374 viviendes públiques onde viven 787 persones. En concreto, 5.526 persones de la rexón accedieron nel 2020 a pisos del Principáu o una ayuda pa pagar l’arriendu.

La renta media mensual de les persones que viven en dalguna de les 9.582 viviendes del parque autonómicu tuvo nel 2020 en 77 euros mensuales, cuatro menos que nel añu anterior. Amás, dende la empresa pública que xestiona los inmuebles del Principáu, Vipasa S.A., diose respuesta a 1.917 consultes d’inquilinos nel marcu del programa d’intermediación comunitaria, diseñáu pa mediar nos conflictos que puen surdir na vecindá y que se ta desenvolviendo con éxitu n’ocho comunidaes d’Uviéu, Xixón, Avilés, Siero, Llangréu y Mieres. El 74 % de los problemes de convivencia detectaos resolviéronse de manera favorable.

Estos datos tán recoyíos na memoria resume de Vipasa correspondiente al añu pasáu y que presentó güei la conseyera de Derechos Sociales y Bienestar, Melania Álvarez, en Villaviciosa, por cuenta de la entrega de les llaves de cinco viviendes públiques nel conceyu.

“Ye importante poner en valor el trabayu desenvueltu dende Vipasa y más nun añu tan escepcional como’l 2020, onde amás de llevar alantre la xestión ordinaria fomos quién a dar respuesta a les persones que viven nuna vivienda pública y a lo llargo de la pandemia da-yos cobertura social de toa clas, dende lleva-yos la compra y les melecines hasta face-yos un siguimientu telefónicu pa nun dexar que se sintieren solos”, destacó la conseyera.

Álvarez resaltó tamién el calter flexible de los arriendos públicos, que, amás d’afacese a la capacidá económica de cada inquilín cuando acceden a la vivienda, revísense dacuando si camuden les circunstancies. “L’añu pasáu 98 persones notificaron que taben pasando dificultaes económiques y reaxustáronse los sos arriendos. Amás, tenemos vixentes 1.216 alcuerdos de pagu con aquelles persones que nun pudieron facer frente a los recibos”, explicó.


Declaraciones Sra. Consejera

Memoria Vipasa