Categories Navigation

Categories Navigation

Mediu Ambiente va empezar anguaño les obres de saniamientu y depuración d’Ayer de Riba, nes que va invertir 6,8 millones

24/05/2021

Un momento de la reunión

  • L’actuación va beneficiar a Coḷḷanzo, La Pola Vieya, Felechosa, El Pino, Cuergo, Santibanes de la Fuente, La Fuente y Yanos.
  • El vicepresidente Juan Cofiño esplicó güei’l proyectu al alcalde y los grupos municipales na Casa Conceyu .

El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, anunció qu’anguaño van empezar les obres de saniamientu y depuración de l’aglomeración d’Ayer de Riba, ente les localidaes de Ḷḷevinco y Felechosa, nes que se van invertir 6,8 millones hasta’l 2023.

Cofiño, acompañáu pol director xeneral de Calidá Ambiental y Cambéu Climáticu, Pablo Álvarez Cabrero, esplicó güei l’actuación que va acometer el so departamentu al alcalde d’Ayer, Juan Carlos Iglesias, y a los portavoces de los grupos municipales, na Casa Conceyu, en Cabanaquinta.

La inversión, cofinanciada pol Fondu Européu de Desenvolvimientu Rexonal (Feder), tien calter plurianual y pártese d’esta manera: 1.025.000 euros anguaño, 3.100.000 l’añu que vien y 2.750.000 nel 2023.

El proyectu va beneficiar a Coḷḷanzo, La Pola Vieya, Felechosa, El Pino, Cuergo, Santibanes de la Fuente, La Fuente y Yanos. Toes estes localidaes sumen una población de 1.160 habitantes, qu’aumenten hasta los 1.928 na selmana de más carga del añu. Les instalaciones de depuración van diseñase pa 2.500 habitantes equivalentes.

L’actuación va desenvolvese en delles fases. De primeres, van acometese obres del tramu ente Felechosa y Yanos, cola mira de recoyer lo vertío de Felechosa, El Pino y La Pola Vieya pa llevalo hasta la futura depuradora, que la so construcción tamién ta incluyida nel proyectu. El llargor de les conducciones va algamar los 1.800 metros y va executase un alliviaderu que va dexar eliminar del colector l’escesu d’agua nos meses que llueve muncho. Estos trabayos van salir a llicitación llueu, con un presupuestu de 918.400 euros y un plazu d’execución de nueve meses.

Pela so parte, la depuradora nueva va instalase nuna superficie averada de 5.000 metros cuadraos, entre La Pola Vieya y Yanos, y va tener un presupuestu d’alredor de 3 millones. La instalación va tratar l’agua residual xenerao na aglomeración d’Ayer de Riba, ente Coḷḷanzo y Felechosa. Na actualidá, la conseyería ta redactando’l pliegu de llicitación pa la redacción del proyectu, que va tar concluyíu nel tramu final d’anguaño pa la so posterior llicitación.

Tamién va tar llista a últimos d’añu la redacción del proyectu pal tramu entre Coḷḷanzo y Yanos, que va riquir una inversión calculada de 1,5 millones. Esti colector va recoyer lo vertío d’estes localidaes pa incorporalo a la futura depuradora.

Otra de les obres que se van acometer ye’l colector que va recoyer l’agua vertío de Ḷḷevinco pa treslladalo a Cabanaquinta, onde se va incorporar al interceptor xeneral d’El Río Ayer pa la so depuración en Baíña. La conseyería cunta disponer del proyectu nel tramu final d’anguaño pa llicitalu por un montante calculáu de 1.450.000 euros.