Categories Navigation

Categories Navigation

El Principado destina 500.000 euros n’ayudes al marisquéu, l’acuicultura y les empreses de tresformación de productos de la pesca

04/06/2021
  • Mediu Rural va dedicar en total un millón al sector pesqueru pa compensar la perda d’ingresos por cuenta de la pandemia

 

El Boletín Oficial del Principáu (Bopa) publica güei la convocatoria d'ayudes estraordinaries empobinaes a l’acuicultura, el marisquéu y les empreses de tresformación de productos por un valor de 500.000 euros. El Gobiernu d'Asturies va destinar en total un millón al sector pesqueru pa compensar les perdes que xeneró la pandemia.

La distribución de la convocatoria por sectores ye la siguiente: 200.000 euros pa subvenciones al marisquéu, 150.000 pa proyectos d’acuicultura y 150.000 pa empreses de tresformación y comercialización de productos. Les bases pueden consultase nel siguiente enllaz: https://cutt.ly/3nx9W31.

A estes cantidaes, hai que sumar otros 500.000 euros n'ayudes estraordinaries a armadores de buques y confraderíes, gastu que foi aprobáu ayeri pol Conseyu de Gobiernu. La convocatoria d'estes subvenciones va publicase nel Bopa esti mes.

La finalidá d'estes llinies d'ayuda ye compensar la mengua d'ingresos motivada pola crisis sanitaria del coronavirus de resultes del amenorgamientu del consumu de determinaos productos por cuenta del zarru d'hoteles, restoranes y cafeteríes, igual que pola incidencia de la crisis nos precios de les captures desembarcaes nes rules.