Categories Navigation

Categories Navigation

El Sespa aumenta la plantiya cola contratación de 150 médicos nuevos

04/06/2021
  • Salú va formalizar 39 nomamientos vinculaos a atención primaria, con 16 facultativos que lleguen d’otres comunidaes 
  • Con esti plan, les árees sanitaries perifériques cunten con 15 profesionales más n’especialidaes deficitaries
  • El conseyeru anuncia un consultoriu nuevu pa Castropol na so visita al área sanitaria I, con cabecera en Xarrio 

El Serviciu de Salú del Principáu (Sespa) contrató a 150 médicos nuevos: 29 facultativos de familia, 10 d’urxencies hospitalaries, 107 especialistes d’área y cuatro pediatres d’atención primaria. Estes incorporaciones formen parte del plan específicu pa la fidelización de residentes con meyores condiciones llaborales.

N’atención primaria realizáronse 39 nomamientos temporales de duración llarga, ente los que figuren 16 especialistes nuevos provinientes d’otres comunidaes.

El conseyeru de Salú, Pablo Fernández Muñiz, refirióse a la contratación de 23 de los 26 especialistes en Medicina de Familia y Comunitaria que se formaron n’Asturies na so visita a los centros periféricos de Castropol y San Tiso d’Abres. Nesti últimu conceyu, empezó a dar serviciu va poco un médicu proviniente de Madrid. Fernández Muñiz atribuyó a les meyores llaborales, que se materialicen en contratos a 3 años, el fechu de qu’Asturies resulte atractiva pa profesionales d’otros llugares del país.

El Sespa ufierta contrataciones eventuales de continuidá, garantizando la estabilidá llaboral. Amás, los profesionales puen escoyer ente les categoríes profesionales de médicu de familia d’Atención Primaria o na Urxencia Hospitalaria l’área sanitaria de la so preferencia.

Amás,  cola cuenta d’atrayer al mayor númberu de profesionales posible, ufiertáronse los nomamientos temporales primero que rematare’l periodu de residencia. D’esta manera, los especialistes siguieron dando servicios nos distintos centros asistenciales, lo que dexó garantizar la continuidá na atención sanitaria.

Nesti sentíu, formalizáronse 107 nomamientos nuevos nes distintes especialidaes médiques y cuatro pediatres de primaria. D’estos profesionales, 31 vienen d’otros servicios de salú. Con estes incorporaciones, dotóse a les árees perifériques con 15 más n’especialidaes tradicionalmente deficitaries onde se producíen movilidaes forzoses.

Otra manera, el Sespa fai posible que los 10 profesionales destinaos a urxencies hospitalaries puedan sofitar en centros de salú de les distintes árees a lo llargo del periodu braniegu. 

Cola contratación inmediata d’especialistes, la ufierta de nomamientos de duración llarga foi quién a fidelizar a los profesionales, al empar que’l Sespa dispón de recursos humanos abondos pa facer frente a la desescalada y recuperar gradualmente l’actividá asistencial.

Consultoriu periféricu nuevu de Castropol

Per otra parte, el titular de Salú anunció la construcción d’un consultoriu nuevu en Castropol que va doblar l’espaciu del actual. Na visita al conceyu, el conseyeru reunióse col alcalde, Franciso Javier Vinjoy, xunto a la xerente del área sanitaria I, Bárbara González de Cangas.

Primero, Fernández tuvo un alcuentru col alcalde de San Tiso d’Abres, Clemente Martínez, y anunció meyores d’eficiencia enerxética, accesibilidá y funcionales nel centru periféricu del conceyu.