Categories Navigation

Categories Navigation

Román Sánchez Torre lleva la quinta edición del Premio «Muséu Barjola» col proyectu Scale Naturae

04/06/2021
  • El xuráu destaca de la propuesta espositiva “la intención de convertir al espectador nun suxetu activu” de la instalación

El proyectu Scale Naturae, de Román Sánchez Torre (Candás, 1978), foi gallardonáu col Premiu «Muséu Barjola» que concede la Conseyería de Cultura, Política Llingüística y Turismu y al qu'aspiraben una quincena de trabayos na fase final de la so quinta edición.

La propuesta de Sánchez Torre ye una instalación compuesta por una gran pieza escultórica-llumínica construyida con 80 módulos qu'actúen como traductor visual del códigu binariu y plantega la Capiya de La Trinidá como la mesma estructura y contenedor d'una máquina llumínica. El xuráu, que tomó la so decisión por unanimidá, valoró que'l trabayu “convida al espectador a un viaxe escontra'l so interior, faciéndolo parte de los sos procesos internos como suxetu activu y convirtiéndolo en voyeur, apurriendo a la propuesta una referencia al popular conceptu desenvueltu por Le Corbusier: machine á habiter”.

El xuráu tuvo presidíu pol director xeneral de Cultura y Patrimoniu, Pablo León, y integráu polos responsables de los equipamientos del Pentágonu del Arte: Lydia Santamarina, del Muséu Barjola; María José Baragaño, de Sala Borrón; Carlos Cuadros, del Centru Niemeyer, y Alfonso Palacios, del Muséu de Belles Artes.

El Premiu «Muséu Barjola», creáu nel 2016 y nel que pueden participar artistes asturianos o residentes nel Principáu, ta dotáu con 5.000 euros. El so oxetivu ye la realización d'un proyectu espositivu que s'integre na capiya de La Trinidá, allugada nel equipamientu museísticu xixonés. Nes ediciones anteriores llevaron los premios Carlos Suárez, por Cita con la historia; Cristina Busto, por Antimapping; el colectivu Offmothers, pol so proyectu Con la casa a cuestas, y Alberto Valverde pola propuesta La causalidad de lo imposible.