Categories Navigation

Categories Navigation

Los grupos de participación infantil y xuvenil reclamen una sociedá más igualitaria

07/06/2021
  • Un total de 50 neños y adolescentes de 25 conceyos apuesten pol desenvolvimientu sostenible y demanden más conseyos locales pa presentar les sos demandes
  • “Queremos qu’esti sector tenga voz nos determinos qu’afecten a les sos vides”, asegura la conseyera Melania Álvarez
  • La población infantil y xuvenil del Principáu reclama una sociedá más igualitaria. Asina quedó de manifiestu na II Xornada autonómica online de grupos de participación infantil y adolescente d’Asturies, convocada pol Institutu Asturianu pa l’Atención Integral a la Infancia y les Families.

 
L’alcuentru telemáticu dexó a los participantes debater sobre’l borrador de la Estratexa Autonómica d’Infancia y Adolescencia, onde trabaya la Conseyería de Derechos Sociales y Bienestar p’alliniar los oxetivos de les polítiques autonómiques nesti ámbitu colos de l’Axenda 2030. En total, 50 neños, neñes y adolescentes de 25 conceyos sumáronse a la xornada y presentaron aportaciones al documentu.
 
Amás de la reclamación d’una sociedá más igualitaria, los grupos de participación tamién demanden l’impulsu de midíes en favor del desenvolvimientu sostenible y un mayor númberu de conseyos locales d’infancia y adolescencia, cola cuenta de que s’establezan en tolos conceyos d’Asturies pa presentar les sos demandes. 
 
“Cuando empezó la llexislatura comprometímonos a escuchar a esti sector pa dar respuesta a les sos necesidaes y tamos faciéndolo. Queremos sofitar una participación social más amplia de la infancia y de l’adolescencia y que neños y mocedá tengan voz nes decisiones qu’afecten a les sos vides”, señaló la conseyera Melania Álvarez.
 
Anguaño, los grupos de participación infantil y xuvenil trabayen en 35 conceyos y axunten a 1.500 menores de 6 a 17 años.