Categories Navigation

Categories Navigation

Política Llingüística destina 4.000 llibros de los sos fondos bibliográficos a 300 centros escolares

07/06/2021
  • La iniciativa forma parte de la campaña Lleer presta, que va tener continuidá con unvios a biblioteques autonómiques y municipales

 

La Conseyería de Cultura, Política Llingüística y Turismu, al traviés de la Dirección Xeneral de Política Llingüística, escoyó 4.000 exemplares de los sos fondos bibliográficos cola mira de destinalos a 301 centros educativos.

Los exemplares escoyíos por Cultura d’estos fondos tán empobinaos a formar parte de les biblioteques escolares de los centros d’enseñanza Primaria y Secundaria, a los que van llegar a últimos d’esti mes. Pa facer la selección, Política Llingüística siguió criterios a tenor d’eses dos etapes educatives y priorizando la donación de los llibros n’asturianu y en gallego-asturianu, en función del ámbitu d’usu d’estes llingües.

La iniciativa forma parte de la campaña de distribución de fondos bibliográficos Lleer presta, que se va completar l’añu que vien col unviu de llibros a les biblioteques autonómiques y municipales.

La Dirección Xeneral de Política Llingüística dispón de un fondu bien curiosu de llibros n’asturianu y gallego-asturianu pa la so incorporación a biblioteques de los centros escolares y a les de titularidá autonómica y municipal, col oxetivu de sofitar la enseñanza y l’aprendimientu n’asturianu y gallego-asturianu.