Categories Navigation

Categories Navigation

Asturies ye la comunidá con meyor resultáu na evaluación de l’actividá investigadora del personal universitario y científico

06/06/2021
  • El Principáu tien una tasa d’éxitu 4 puntos perriba de la media nacional na acreitación de sexenios d’investigación
  • El 97 % de les solicitúes llogren l’aprobación de l’axencia nacional examinadora de la calidá

Asturies ye la comunidá con mayor tasa d’éxitu na evaluación de l’actividá investigadora. El 97 % del personal científico de centros públicos que solicitó l’acreitación de la investigación realizada seis años -un reconocimientu conocíu como sexeniu d’investigación que mide la calidá y l’excelencia-, llogró l’aprobación de l’Axencia Nacional d’Evaluación de la Calidá y Acreitación (Aneca). El datu asitia al Principáu cuatro puntos percima de la media nacional.

El sexeniu ye la vía principal p’acreitar los méritos na actividá investigadora desenvuelta pol profesoráu universitario y pol personal investigador funcionario de los organismos públicos como’l Centru Superior d’Investigaciones Científiques (CSIC). Implica una medría retributiva y un reconocimientu d’excelencia científica, y pue optase a un máximu de seis tramos a lo llargo de la vida profesional (36 años d’investigación).

La Comisión Nacional Evaluadora de l’Actividá Investigadora (CNEAI), organismu de l’Aneca y de la que forma parte la directora xeneral d’Universidá, Cristina González, informó esta selmana del resultáu de la evaluación de les solicitúes correspondientes al 2020. De los 174 pidimientos de reconocimientu de tramos d’investigación presentaos, 167 llograron un resultáu positivu.

Los criterios de concesión d’un sexeniu d’investigación son mui esixentes y céntrense tanto nel currículum como na producción científica y na calidá de les publicaciones. La investigación asturiana ocupó los primeros puestos na tasa d’éxitu nos postreros cuatro años.

El Principáu ta percima de la media nel porcentaxe de profesoráu con polo menos un sexeniu reconocíu, el 81,83 %, alredor de mil docentes universitarios. El 5,31 % del personal investigador asturiano tien seis tramos, el máximu reconocíu, y Asturies ye la segunda comunidá con más investigadores con cinco sexenios.

El resultáu positivu na acreitación de la investigación asturiana súmase a la bona posición qu’ostenta tamién el Principáu na tresferencia de conocimientu, la contribución del personal investigador al desenvolvimientu territorial.