Categories Navigation

Categories Navigation

Los equipamientos y los circuitos culturales del Principáu programen pa esti mes más de 200 actividaes

06/06/2021

  • El programa Asturies, Cultura en Rede va llevar 90 actuaciones, esposiciones, alcuentros y proyecciones cinematográfiques per tol territoriu .
  • El Centru Niemeyer abre la sesta edición del Festival de Cine LGTBI y el Muséu Barjola inaugura cuatro muestres.
  • El Muséu Arqueolóxicu acueye les Xornaes Europees d'Arqueoloxía y el Belles Artes, la exhibición Gusto y tradición .

Los equipamientos dependientes directa o orgánicamente del Gobiernu d'Asturies y los circuitos culturales promovíos pola Conseyería de Cultura, en collaboración colos conceyos dende'l programa Asturies, Cultura en Rede; sumen 207 actividaes programaes pa esti mes.

Depués d'incrementar notablemente la so actividá tres les convocatories últimes, los circuitos d’Asturies, Cultura en Rede van llevar 90 actividaes por distintos conceyos. Asina, tán programaes 17 funciones d'artes escéniques, 12 actuaciones musicales, 8 esposiciones, 14 actividaes de cultura tradicional, 6 de lliteratura, 3 alcuentros nel circuitu Autores nel Camín, y 30 proyecciones na Cinemateca Ambulante.

Tocante a los equipamientos dependientes de la Conseyería de Cultura, la so ufierta tamién s'intensifica en xunu y presenta cites singulares, caúnu na so llinia habitual de programación.

 

Muséu de Belles Artes d'Asturies

Ente les propuestes del Muséu de Belles Artes d'Asturies destaquen dos inauguraciones: el día 17, la de la muestra de Nicolás Muller Viento norte, y el día 24, la de la esposición Gusto y tradición, na que van poder vese 23 de les obres de la colección del conde de Villagonzalo y de María Luisa Corrada.

 

Muséu Arqueolóxicu d'Asturies

El Muséu Arqueolóxicu va ser l'escenariu de les Xornaes Europees d'Arqueoloxía, una iniciativa del Ministeriu de Cultura del Gobiernu de Francia, coordinada n'España pol Institutu del Patrimoniu Cultural d'España, del Ministeriu de Cultura y Deporte. Van tener llugar los díes 18 y 19, y van consistir nuna conferencia y una mesa redonda rellacionada col patrimoniu arqueolóxicu.

 

Muséu Barjola

El Muséu Barjola inaugura cuatro esposiciones esti mes: La xira estática, del grupu asturianu Losone, una muestra multidisciplinar abierta yá dende'l vienres pasáu; Lo invisible, de Rosell Meseguer, comisariada por Natalia Alonso, que va abrir el día 11; Miraes 2021, que s'inaugura'l 25 y, a finales de mes, Nicolás Muller, la mirada comprometida, en collaboración col Institutu Cervantes y comisariada por José Ferrero.

 

Centru Niemeyer

El Centru Niemeyer acueye del 19 al 27 la sesta edición del Festival de Cine LGTBI. Amás, el día 25 inaugúrase la esposición Joan Ponç. La esencia de lo mágico. El centru cultural avilesín caltién abiertes La emoción del espacio, hasta'l día 13, y la muestra Afluencias, de Miguel Trillo.

 

Ridea y Archivu Históricu

Na programación del Ridea destaca l'apertura, el día 8, de la esposición 75 años de cultura asturiana, enmarcada na conmemoración de los 75 años de la institución. Amás, tien programaes dos conferencies del ciclu Perspectivas de la industria asturiana, y una sobre l'empiezu de la Guerra de la Independencia. L'Archivu Históricu, pela so parte, inaugura'l día 14 la esposición El doctor Avelino González. De la beneficencia a la cuestión social. Amás, del 18 al 20 acueye los Encuentros entre mujeres cincuenter, en collaboración cola Fundación Municipal de Cultura d'Uviéu.

 

Biblioteques

La Biblioteca d'Asturies Ramón Pérez de Ayala presenta y inaugura’l 11 la esposición Oviedo, origen y destino: el Camino de Santiago en 200 libros, que va permanecer abierta hasta'l 26 de setiembre. Tanto la Biblioteca d'Asturies como la Biblioteca Xovellanos programen actividaes pal públicu la primer y tercer fin de selmana del mes.

 

Llaboral Ciudá de la Cultura

Na programación de Llaboral Ciudá de la Cultura destaquen el conciertu de la cantaora María José Llergo, el día 18, y l'espectáculu de Berto Romero Mucha tontería, del 25 al 27.

 

El restu de los espacios culturales dependientes de la Conseyería de Cultura y xestionaos pola Sociedá Pública de Xestión y Promoción Turística y Cultural (Muxa, Centru d'Arte Rupestre Tito Bustillo, Centru del Prerrománicu y Parque de la Prehistoria) caltienen la so ufierta habitual pa tou tipu de públicu y programen, en xunto, unes 50 actividaes.