Categories Navigation

Categories Navigation

La Conseyería de Derechos Sociales y el Conceyu de La Ribera impulsen un plan d'inclusión social pa La Llosa

09/06/2021

La Consejera de Derechos Sociales

  • La conseyera Melania Álvarez destaca que dambes alministraciones van tener en cuenta la opinión de les families que viven na zona
  • La primer mesa de trabayu va celebrase'l día 18 y la intervención pa la meyora de la convivencia va empezar en seis meses

La Conseyería de Derechos Sociales y Bienestar y el Conceyu de La Ribera soscribieron güei un protocolu pa la ellaboración d'un plan especial d'inclusión social destináu a les families residentes en La Llosa, en Ferreros. El proyectu engloba un análisis de la situación actual na que viven estes persones y tamién de les sos circunstancies económiques. Desque remate l'estudiu, va impulsase un plan integral d'intervención nel que van participar tanto los profesionales de Vipasa como l'equipu territorial de servicios sociales de la área IV.

La conseyera Melania Álvarez adelantó que la primer xunta de trabayu va celebrase'l 18 de xunu y que'l plan especial d'intervención, que va incluyir midíes en favor de la meyora de la convivencia na zona, va tar redactáu nun plazu de seis meses. “Trátase d'una collaboración ente alministraciones na que tamién va tenese en cuenta la opinión de les families residentes”, aseguró.

El protocolu nun supón gastu dalgunu pa les partes firmantes, yá que consiste nel establecimientu d'una fórmula de coordinación ente la conseyería y el Conceyu nel desenvolvimientu de les sos competencies propies, pa lo que dambes alministraciones van utilizar los mecanismos y recursos de los sos respectivos ámbitos. “Esta ye la muestra de qu'en bien de casos puede avanzase ensin necesidá de grandes inversiones, pero sí repensando los modelos que queremos establecer y buscando soluciones”, sorrayó la titular de Derechos Sociales.