Categories Navigation

Categories Navigation

La rede de comercios distribuidores de productos de la marca Alimentos del Paraísu suma 226 establecimientos adscritos en dos meses

09/06/2021

  

  • La iniciativa, impulsada pol Principáu y la Unión de Comerciantes, promociona la compra d'alimentos amparaos por esti sellu en tiendes de tamañu pequeñu y medianu

 

La rede de comercios d'alimentación distribuidores de productos de la marca Alimentos del Paraísu, puesta en marcha va apenes dos meses, suma yá 226 establecimientos adscritos. Esta iniciativa, impulsada pol Gobiernu del Principáu y la Unión de Comerciantes d'Asturies, tien como oxetivu promocionar la compra d'alimentos amparaos por esti sellu de calidá en tiendes de tamañu pequeñu y medianu. 

Esta ye la primer esperiencia que se pon en marcha n'Asturies pa xunir el sector de la producción y el de la distribución de menor tamañu, el más numberosu na comunidá. D'esta miente, xunto col fomentu del consumu d'Alimentos del Paraísu, poténciense les canales curties de comercialización y promuévese la compra de proximidá.

Los comercios minoristes integraos na rede usen un logotipu que dexa a los consumidores identificalos fácilmente. Nesti sentíu, la directora xeneral de Desenvolvimientu Rural y Agroalimentación, Begoña López; el director xeneral de Comerciu, Julio González Zapico, y la presidenta de la Unión de Comerciantes d'Asturies, Sara Menéndez, entrgaron güei los identificadores a establecimientos que se sumaron a esta iniciativa de los conceyos d'El Franco, Parres, Uviéu y Xixón.

Nel alcuerdu ente'l Principáu y l'Asociación de Comerciantes ta prevista tamién la incorporación d'establecimientos a la rede de pescaderíes con productos de la marca Pexe de confianza, impulsada pola Nueva Rula d'Avilés, el primer operador venceyáu al sector pesqueru que se sumó al sellu de garantía Alimento del Paraísu.

Esta marca estrema los productos agroalimentarios y pesqueros producíos y/o ellaboraos n'Asturies, de la que garantiza'l so orixe xeográficu y calidá. Anguaño, cunta con 347 operadores inscritos, y cuadriplicó’l númberu de productores y ellaboradores que s’unieron nos años últimos.


  Declaraciones directora general de Desarrollo Rural y Agroalimentación (Mp3: 413 Kb)