Categories Navigation

Categories Navigation

El Gobiernu d'Asturies clasifica les zones rurales pa reforciar la cohesión y fomentar l'actividá económica en tol territoriu

10/06/2021

  • El Principáu va poner en marcha polítiques singulares pa caúna de les trés tipoloxíes d'árees definíes nel documentu: periurbana, intensificada y campesina.
  • Esti informe va incorporase al procesu d'ellaboración de la futura Llei d'Ordenación Integral del Territoriu.
  • El conseyeru de Mediu Rural y el comisionado pal Retu Demográficu presentaron güei l'estudiu, que va sirvir de base pa impulsar actividaes agraries, ganaderes y forestales .

El Gobiernu del Principáu ellaboró un informe que clasifica les zones rurales pa reforciar la cohesión territorial y fomentar l'actividá económica en tola comunidá. El documentu Aproximación a las tipologías de las zonas rurales de Asturias, ellaboráu pol comisionáu pal Retu Demográficu cola collaboración de la Conseyería de Mediu Rural y Cohesión Territorial y la Sociedá Asturiana d'Estudios Económicos y Industriales (Sadei), define trés tipos d'árees rurales cola mira d'impulsar distintes polítiques agraries, ganaderes y forestales en función de les característiques de caúna d'elles.

L'informe va sirvir de base nel plan de desenvolvimientu rural d'Asturies y les sos estratexes sectoriales, yá qu’aspira a ameyorar la vinculación ente'l mediu rural y les zones urbanes, mesmo qu’a reforciar el caltenimientu de los paisaxes y l’agrobiodiversidá.

El conseyeru de Mediu Rural, Alejandro Calvo, y el comisionáu pal Retu Demográficu, Jaime Izquierdo, presentaron güei esti trabayu, que plantega trés tipos de zona rural: periurbana, intensificada y campesina. Pa realizar esta clasificación, túvose en cuenta la unidá territorial de la parroquia y consideráronse factores como la población, la bioxeografía, la renta de la población o los usos agrarios predominantes.

La definición tien la so base na Llei 45/2007, de 13 d'avientu, pal desenvolvimientu sostenible del mediu rural, que nel so artículu 10 define trés zones rurales. Esta delimitación nueva va dexar poner en marcha polítiques afeches a cada zona, que se resumen nestes idees:

  • Árees periurbanes. Va potenciase'l desenvolvimientu de planes locales d'agricultura p'abastecer los mercaos urbanos. Tamién se va concenciar sobre la necesidá d'actuar de forma colectiva, como comunidá, pa xestionar un proyectu de futuru común.
  • Árees intensificaes. Va ameyorase la eficiencia, rentabilidá y integración ambiental de les agricultures intensives.
  • Árees campesines. Van desenvolvese planes agroecolóxicos pa les aldegues y parroquies de los espacios protexíos y los territorios rurales más naturalizaos.

Esta tabla muestra les resultancies de la zonificación por tipoloxíes:

ZonesParroquies (n.u)N.u %km²km² %
Urbanes242,79174,6831,65
Periurbanes12814,901091,76510,30
Intensives22426,082.144,86120,24
Campesines48356,237.183,51267,80
TOTAL:859(1)100,0010.594,821100,00

(1). 857 parroquies + 2 árees non adscrites a entidá colectiva

El conseyeru de Mediu Rural y Cohesión Territorial, Alejandro Calvo, señaló que'l trabayu va incorporase al procesu d'ellaboración de la futura Llei d'Ordenación Integral del Territoriu (LOITA). Calvo esplicó que manifiesta la importancia que tien la ordenación del mediu rural coles mires de potenciar l'actividá nel mesmu p'afitar población.

L'agricultura, pensada tanto pa la esportación como pal suministru interior, tien un marxe bien ampliu de crecedera y meyora, pa lo que precisa evolucionar escontra planteamientos nuevos qu'aumenten la so rentabilidá y abran oportunidaes. El modelu de futuru tien de dir a reducir los riesgos ambientales, facilitar la xestión integral del paisaxe y recuperar races ganaderes, asina como variedaes y cultivos agrícoles en desusu o en peligru d'estinción. Tamién tien que centrase nel abastu a los mercaos urbanos de proximidá.


 Aproximación a las tipologías de las zonas rurales de Asturias (pdf: 11,2 Mb)