Categories Navigation

Categories Navigation

Cultura presenta la programación del Veranu Xacobéu en Payares, destinada a impulsar l'actividá del branu na estación l.leniza

10/06/2021

  • Les actividaes van tar disponibles toles fines de selmana dende'l sábadu 19 de xunu hasta'l sábadu 19 de setiembre.
  • L'equipamientu va abrir el telesilla El Brañil.lín y el serviciu de cafetería en Cuitu Nigru, que van integrase n'ufiertes conxuntes.

La directora xeneral de Deporte, Beatriz Álvarez Mesa, presentó güei’l programa Veranu Xacobéu en Payares, la segunda edición de la iniciativa impulsada pola Conseyería de Cultura, Política Llingüística y Turismu nel so apueste pola reactivación y la desestacionalización de la estación l.leniza de Valgrande-Payares.

Esti ye'l segundu añu consecutivu que la Dirección Xeneral de Deporte programa actividaes nel equipamientu de Valgrande-Payares en periodu de branu cola organización y la puesta en marcha d'un programa d'actividaes deportives y lúdiques que tienen como finalidá la de complementar l’atractivu turísticu de la estación. Na so primer edición, Veranu en Payares saldóse con bien bonos resultaos magar les adverses circunstancies de la pandemia.

Les actividaes van empezar el sábadu 19 de xunu y van llevase a cabu mientres toles fines de selmana socesives hasta'l sábadu 19 de setiembre. La programación vuelve incluyir delles de les actividaes que meyor acoyida tuvieron l’añu pasáu, como les de senderismu con rutes guiaes, bike-park, descensu de bicicletes o paintball.

El programa d'anguaño incorpora amás xornaes d'ensayamientu canín, na que s'incluyen tamién senderismu con perros, primeros auxilios veterinarios y cursos d'iniciu al rescate en monte con perru. Asina mesmo, programáronse dos nueches blanques que van consistir en rutes guiaes percorriendo la estación con lluna llena, otres dos nueches con talleres de astrofotografía y una concentración de coches antiguos.

Ente les actividaes deportives, destaquen la programación de la Carrera popular Xacobea, un tornéu de baloncestu 3x3, una clase maxistral de descensu de bicicleta de monte o una competición de crono-escalada de ciclismu.

La mesma infraestructura de la estación l.leniza aporta al Veranu Xacobéu en Payares dos importantes atractivos: l'apertura del telesiella d'El Brañil.lín, pa poder aportar a la parte alta de la estación, y la de la cafetería Cuitu Nigru. Dambos formen parte d'una ufierta que suma actividá, telesiella y comida asturiana por un preciu especial.

Álvarez Mesa señaló mientres la so intervención na presentación del programa que con Veranu Xacobéu en Payares el Gobiernu d'Asturies “pon de manifiestu'l so apueste pola desestacionalización de Valgrande-Payares y la diversificación na ufierta d'actividaes que potencien el valor turísticu del equipamientu”. La directora de Deporte añedió que la iniciativa sofita “el deporte na so globalidá, con prudencia y con responsabilidá, pero tamién pon en valor la relevancia del equipamientu como motor económicu de la comarca de L.lena”.

Los interesaos n'aportar a les actividaes programaes en Veranu en Payares han inscribise primeramente al traviés de la páxina www.lenabtr.com, el corréu electrónicu info@lenabtr.com o'l teléfonu 673 503 478.