Categories Navigation

Categories Navigation

El Principáu convoca ayudes por aproximao 800.000 euros pa grupos d'acción local de pesca y entidaes asociatives agraries

11/06/2021
  • Estes subvenciones constituyen un instrumentu importante pa favorecer la modernización de dambos sectores 

El Boletín Oficial del Principáu (BOPA) publica güei les convocatories d'ayudes a grupos d'acción local de pesca y a entidaes asociatives agraries. Les subvenciones, dotaes con aproximao 800.000 euros, constituyen un instrumentu importante pa favorecer la diversificación y modernización de dambos sectores. 

Les ayudes pa l'aplicación de les estratexes de desenvolvimientu local participativu canalícense al traviés de los siete grupos d'acción local de pesca del Principáu y tán dotaes con 193.404 euros. Esta llinia d’apoyu cunta con financiamientu de la Unión Europea (UE) al traviés del Fondu Européu Marítimu y de la Pesca (Femp).

Pela so parte, les subvenciones a entidaes asociatives agraries tán dotaes con 600.000 euros y favorecen la meyora de los resultaos económicos de les esplotaciones agrícoles. Tamién faciliten la so modernización, de la qu'incrementen la so orientación escontra'l mercáu. Les ayudes tán cofinanciaes pola UE, al traviés del Fondu Européu Agrícola de Desenvolvimientu Rural (Feader), y el presupuestu distribúyese en dos anualidaes: 325.000 euros anguaño y 275.000 el próximu.

Estes subvenciones faciliten l'accesu de les cooperatives a factores de producción que nun podríen incorporar de forma individual polos costos d'inversión. Por exemplu, dexen la compra de máquines de siembra directa y equipos pa la recoyida de la lleche.