Categories Navigation

Categories Navigation

El Principáu ameyora la movilidá nos Picos d'Europa con un serviciu de tresporte especial a la ruta del Cares y otres árees turístiques de Cabrales

11/06/2021

Un momento de la visita

  • Les persones que visiten el parque van poder viaxar n'autobús ente Arenas, Poncebos, Tielve y Sotres del 19 de xunu al 12 de setiembre pa evitar aglomeraciones y protexer l’entornu.
  • Habilitáronse aparcamientos n'Arenas y Ovar y va acutase l’estacionamientu en Pandébano, Sotres y Poncebos.

La Conseyería de Mediu Rural y Cohesión Territorial va poner en marcha esti branu un plan especial de tresporte ente Arenas y Sotres (Cabrales), con paraes n’Ovar, Poncebos y Tielve, pa evitar les aglomeraciones de tráficu y ufiertar una alternativa segura y cómoda a les numberoses persones que visiten nestes feches enclaves como la ruta del Cares, Bulnes o Pandébano, allugaos nel corazón del Parque Nacional de los Picos d'Europa.

El viceconseyeru d'Infraestructures, Movilidá y Territoriu, Jorge García, presentó güei en Cabrales, xunto col alcalde, José Sánchez, esta ruta, que va cubrise n'autobuses con salida dende Arenas, onde s'habilitaron trés árees d'aparcamientu, y llegada a Poncebos. Dende equí puede empecipiase la ruta del Cares, tomar el funicular a Bulnes o movese en microbús, por cuenta de les característiques de la vía, a Tielve o Sotres, qu'axunten zones d'importante valor natural y paisaxísticu como la collada de Pandébano.

El trayectu va costar 1,55 euros d'Arenas a Poncebos, al igual que dende esta última localidá a Tielve o Sotres, mentes que'l preciu del billete d'ida y vuelta va ser de 3 euros. El percorríu completu (Arenas-Poncebos-Sotres/Tielve) va tener un costu de 2,60 euros y de 5 en casu d'ida y vuelta. Los billetes van poder adquirise de manera antemanada al traviés de la páxina web d’Alsa o plataformes dixitales, y tamién nos mesmos autobuses.

Esti serviciu especial de tresporte públicu va funcionar tolos díes, de manera ininterrumpida, dende'l sábadu 19 de xunu hasta'l domingu 12 de setiembre, con frecuencies prácticamente horaries dende les 10:00 hasta les 20:00 hores, que podríen adaptase si hai necesidá. El primer autobús va salir d'Arenas a les 10 de la mañana y, desque llegue a Poncebos, los viaxeros van poder realizar tresbordu pa llegar a Sotres a les 10:50 hores. L'últimu serviciu del día va partir dende Poncebos a les 20:00 hores pa concluyir n'Arenas sobre les 21:00.

Pa fomentar l'usu d'esti operativu, los visitantes van disponer de cuatru árees d'aparcamientu: trés d'elles n'Arenas y una n’Ovar. L'usu de los estacionamientos en Pandébano, Sotres y Poncebos va tar acutáu pa dar prioridá a los residentes.

 

Control de tráficu en Pandébano

La collada de Pandébano ye otru de los puntos más visitaos del parque nacional de los Picos d'Europa, al sirvir de puntu de partida p'aportar a los refuxos de la Terenosa y del H.ou de el Cabrones, asina como a la vega del Urriellu, al refuxu, y al propiu Urriellu. Dende esti allugamientu puede aportase tamién, al traviés d'una ruta cenciella, hasta Bulnes. Por cuenta de la llegada de visitantes a Pandébano, la conseyería estableció anguaño un control del tráficu y del aparcamientu de los vehículos qu'apuerten a esta zona p'asegurar el caltenimientu del entornu.

Mediu Rural y el Consorciu de Tresportes d'Asturies (CTA) entamen esti serviciu, similar al puestu en marcha ente Cuadonga y los llagos, gracies a la coordinación de les direcciones xenerales de Movilidá y de Mediu Natural y el Conceyu de Cabrales. El dispositivu yá se probó l'añu pasáu con un primer proyectu pilotu desenvueltu mientres delles xornaes de setiembre, coincidiendo cola festividá del Día d'Asturies.

A la presentación celebrada güei asistieron tamién los directores xenerales de Mediu Natural y Planificación Rural, David Villar, y de Tresportes y Movilidá, José Manuel Caldevilla, asina como’l director del Parque Nacional de Picos d'Europa n'Asturies, Rodrigo Robledano.


Declaraciones del Viceconsejero de Infraestructuras

Control de tráfico Pandébano

Plan de Transporte Cares