Categories Navigation

Categories Navigation

Educación firma cola rede concertada un alcuerdu qu'ameyora les ratios de profesoráu na etapa d'Infantil

15/06/2021
  • La Dirección Xeneral de Planificación va convocar nuevamente a patronal y sindicatos pa siguir negociando la paga d'antigüedá del personal d'educación especial 


La Conseyería d'Educación algamó esta mañana un alcuerdu cola patronal y los sindicatos de la rede concertada-privada sobre l'Alcuerdu pa la meyora de la calidá educativa de la enseñanza y el caltenimientu d'empléu nel marcu de la concertación d'unidaes escolares adscrites a centros privaos. El documentu, que se va firmar oficialmente esta mesma selmana, supón la meyora de les ratios de profesoráu por unidá na etapa d'Educación Infantil a partir del cursu próximu.

La directora xeneral de Planificación y Infraestructures Educatives, Lydia Espina, esplicó qu'esti alcuerdu, adoptáu con un respaldu superior al 90 % de la representación, traduzse nun aumentu de la plantiya n'Infantil y nuna meyora xeneralizada de la calidá educativa de los centros.

Per otru llau, Lydia Espina esplicó que nes selmanes próximes va convocase otra vegada a la representación de la rede concertada col enfotu de siguir negociando un alcuerdu nuevu p'abonar la paga estraordinaria d'antigüedá, recoyida nel XV conveniu colectivu xeneral de centros y servicios d'atención a persones con discapacidá. Esta ye una reivindicación yá encarada en xuntes anteriores. 

“Tamos cumpliendo col nuestru firme compromisu d'analizar les demandes que tán plantegando tanto les patronales como les organizaciones sindicales p'ameyorar les condiciones del profesoráu y del alumnáu matriculáu nesta rede”, señaló Espina, que la so intención ye caltener abiertu este calce de comunicación pal cursu escolar próximu.